پاکستان ٹیسٹ ٹیم کے کپتان شان  مسعود کا کہنا ہے کہ  میرا نمبر 3 ہے اور میں اسی نمبر پر کھیلوں گا۔

تفصیلات کے مطابق راولپنڈی میں پریس کانفرنس کرتے ہوئے  پاکستان ٹیسٹ ٹیم کے کپتان شان مسعود  نے کہا کہ   امام اور عبداللہ کا اوپننگ کمبی نیشن ایک سال سے بہت اچھا  چل رہا ہے۔

شان مسعود نے کہا کہ  ہماری کوشش ہوگی جو جس نمبر پر اچھا کر رہے  ہیں ، انہیں اسی نمبر پر موقع دینا چاہیے۔  میرا نمبر 3 ہے اور میں اسی نمبر پر کھیلوں گا۔

ان کا کہنا تھا کہ  ہم نے آسٹریلیا سیریز  کے لیے پنڈی میں بہت اچھی تیاری کی ہے۔ ہماری کوشش ہوگی آسٹریلیا سے اچھے نتائج لے کر آئیں۔

قومی کرکٹ ٹیم کے کپتان نے کہا کہ   مجھے ڈیڑھ سال لگا تھا ٹیسٹ ٹیم میں واپسی  کے لیے  ، میں ڈراپ ہونے کے بعد رنز کرکے واپس آیا تھا۔ صائم ایوب پورے ڈومیسٹک سیزن  کے لیے مثال ہے کہ کیسے آپ قومی ٹیم میں جگہ بناتے ہیں۔

شان مسعود کا کہنا تھا کہ حارث رؤف کو ٹیم میں رکھنا ہماری خواہش تھی لیکن پلیئر کے فیصلے کو عزت دینی چاہیے۔

Pakistan Test Captain Shan Masood's press conference ahead of Australia Tour#AUSvPAK | #BackTheBoysInGreen https://www.bolnews.com/urdu/sports/cricket/2023/11/554180/amp/

— Pakistan Cricket (@TheRealPCB) November 29, 2023

انہوں نے کہا کہ  میں آسٹریلیا کے دورے کو ایک اہم موقع سمجھتا ہوں ۔ہمیں معلوم ہے یہ دورہ ایک چیلنجنگ ہوگا۔

ایک سوال کے جواب میں شان مسعود نے کہا کہ  قربانی کا بکرا جہاں تک سوال ہے،  کپتانی اور سب چیزیں عارضی ہوتی ہیں۔ ٹیم میں ایک سے زیادہ کپتان ہونا ،میں اس کو مثبت لیتا ہوں۔  ٹیم کا لیڈر ہر ایک ممبر ہوتا ہے اور ہمیں مل کر فائٹ کرنا ہوگی۔

انہوں نے کہا کہ  ٹیم کی سلیکشن میں سلیکٹرز، کوچز اور کپتان سب کا مشورہ شامل ہوتا ہے۔

واضح رہے کہ پاکستان کو آسٹریلیا میں 14 دسمبر 2023 سے 7 جنوری 2024 تک تین ٹیسٹ میچز کی سیریز کھیلنی ہے۔

اس سےقبل پاکستان ٹیم وہاں پرائم منسٹر الیون کے خلاف ایک چار روزہ میچ بھی کھیلے گی۔