آسٹریلوی کپتان پیٹ کمنز بھی عثمان خواجہ کی حمایت  میں سامنے آگئے۔

تفصیلات کے مطابق آسٹریلیا کے کپتان پیٹ کمنز نے اوپنر عثمان خواجہ کے  فلسطین سے متعلق موقف کی حمایت کرتے ہوئے کہا کہ خواجہ کے خیالات ’غیر جارحانہ ‘اور انسانی بحران کی طرف توجہ دلانے کی کوشش قرار دیا ہے۔

پیٹ کمنز کا کہنا ہے کہ عثمان خواجہ کا موقف درست اور معزز انداز میں ہے۔ امن کی علامت فاختہ والا  سائن ممنوع نہیں ہے۔

انہوں نے کہا کہ آئی سی سی کے اپنے قواعد ہیں اور ہم ان کو مانتے ہیں۔

واضح رہے کہ آسٹریلوی اوپنر عثمان خواجہ غزہ پر جاری اسرائیلی جارحیت کے خلاف فلسطینیوں سے اظہار یکجہتی اور ان کے حق میں مظاہرے کے لیے کوشاں ہیں ۔

تاہم پرتھ ٹیسٹ کے بعد میلبرن ٹیسٹ میں بھی آئی سی سی ان کی راہ میں مزاحم ہو گئی ہے اور انہیں ’سب انسان برابر ہیں‘ کے سلوگن کے علاوہ بیٹ پر امن کا نشان فاختہ لگانے سے بھی روک دیا ہے۔