10 ارب ڈالرز کی لاگت سے بننے والی جیمز ویب اسپیس ٹیلی اسکوپ کی لانچ ایک بار پھر ملتوی کردی گئی۔ ٹیلی اسکوپ کو خلاء میں 22 دسمبر کو بھیجا جانا تھا تاہم کچھ تکینیکی وجوہات کی بناء پر یہ لانچ 24 دسمبر سے پہلے نہیں ہو سکے گی۔

ناسا کے سائنس ڈویژن کے ہیڈ کے مطابق فرینچ گیانا میں ٹیلی اسکوپ کو آریانے 5 لانچر سے جوڑنے کے بعد انجینئروں کو گراؤنڈ سپورٹ ایکوئپمنٹ کے ایک ٹکڑے کے ساتھ کوئی مسئلہ دِکھائی دیا۔ مسئلے کے حل کے پیشِ نظر آبزرویٹری کی لانچ کم از کم دو دن یعنی 24 دسمبر تک ملتوی ہوگی۔

مشن کو اس سے پہلے 22 دسمبر کو گیانا اسپیس سینٹر سے لانچ ہونا تھا۔ ٹیلی اسکوپ کی لانچ کے لیے حتمی مراحل ہفتے کے روز طے ہوئے جب آبزرویٹری کو آریانے 5 راکٹ کے اوپر لگا دیا گیا۔

لیکن تکنیکی مسئلے نے اس لانچ کے اگلے قدم کو روک دیا۔

منگل کے روز ایک مختصر بیان میں ناسانے اپنی ویب سائٹ پر کہا کہ ویب ٹیم آبزرویٹری اور لانچ وہیکل سسٹم کے درمیان مواصلاتی مسئلے پر کام کر رہی ہے۔

ناسا کے سائنس مشن ڈائریکٹوریٹ کے ایسوسی ایٹ ایڈمنسٹریٹر تھامس زربُکن نے منگل کے روز بتایا کہ انجینیئرز کو آریانے 5 راکٹ کے اوپر ’ویب‘ کے ساتھ رابطہ کرنے والے سسٹم میں ایک انٹرفیس پرابلم دِکھا۔

انہوں نے کہا کہ دراصل ڈیٹا کیبل کچھ فریم چھوڑ رہی ہیں۔

آریانے 5 راکٹ کی حتمی تکمیل میں اندر موجود ٹیکنیشئنز نے پیش آنے والے مسئلے کو ڈھونڈنے کی کوشش کی ہے لیکن ابھی تک اس کو حل نہیں کر پائے ہیں۔