پاکستان شوبز انڈسٹری کے ورسٹائل سینیئر اداکار بہروز سبزواری نے عالمی وبا کورونا وائرس کو شکست دے دی۔

تفصیلات کے مطابق بہروز سبزواری اسپتال سے ڈسچارج ہوگئے ہیں، جس کی اطلاع اُن کے صاحبزادے شہروز سبزواری نے سوشل میڈیا کے ذریعے دی ہے۔

گزشتہ روز شہروز سبزواری نے ہی انسٹاگرام اسٹوری میں اپنے والد کی صحت سے متعلق مداحوں کو آگاہ کرتے ہوئے کہا خدا کی مہربانی سے اب ان کے والد بالکل ٹھیک ہیں اور اسپتال سے گھر منتقل ہوگئے ہیں۔

انہوں نے اپنے والد کی صحت یابی کے لیے دعا کرنے والے لوگوں کا شکریہ بھی ادا کیا۔

واضح رہے کہ بہروز سبزواری نے علامات ظاہر ہونے پر گزشتہ دنوں کورونا وائرس ٹیسٹ کروایا تھا جو کہ بدقسمتی سے مثبت آیا تھا۔

کورونا وائرس کا ٹیسٹ مثبت آنے کے بعد بہروز سبزواری کی طبیعت زیادہ بگڑ گئی تھی جس کے بعد اُنہیں اسپتال میں داخل کردیا گیا تھا۔