کراچی کے مختلف علاقوں میں بارش کےبعدموسم خوشگوار ہوگیا۔ محکمہ موسمیات کے مطابق سندھ میں مون سون کانیا سسٹم داخل ہوگیا۔

تفصیلات کے مطابق کراچی کےعلاقے ملیر، ایئرپورٹ،شارع فیصل،ملیر کینٹ، اسٹیل ٹاؤن میں موسلا دھاربارش کے بعد سڑکیں زیر آب آگئیں۔شہرقائد کےعلاقے گلبرگ، نارتھ کراچی، نیوکراچی، سرجانی،گلشن معمار،گڈاپ ،گلستان جوہر، شاہ فیصل، کورنگی، لانڈھی، گلشن اقبال میں بھی بارش ریکارڈ کی گئی۔

ملیر کے مختلف علاقوں میں گہرے بادل دن میں رات کا منظرپیش کررہے ہیں۔ شہر میں صبح سے ہی وقفےوقفے سے بارش کا سلسلہ جاری ہے۔چند گھنٹوں کی بارش سے سڑکیں تالاب کا منظر پیش کر نے لگی۔

شہر میں موسلادھار بارش کے بعد نکاسی آب کا نظام درہم برہم ہوگیا۔ شاہراہ فیصل ڈرگ روڈ کے قریب پانی جمع ہےجس کے باعث واٹر بورڈ کا عملہ پانی کی نکاسی میں مصروف ہے۔بارش کے پیش نظر ٹریفک اور ضلعی پولیس ٹریفک کی روانی بحال رکھنے میں مصروف ہیں۔

شہر کے مختلف علاقوں میں بارش کے بعد بجلی کی فراہمی معطل کردی گئی۔ لیاقت آباد سی ون ایریا، نارتھ ناظم آباد، طارق بن زیاد سوسائٹی میں بجلی بندہے۔ جبکہ  نارتھ کراچی، نیو کراچی، شادمان ٹاؤن، سرجانی ٹاون ،پہلوان گوٹھ، صفورا گوٹھ اوراسکیم 33 میں بھی بجلی بندکردی گئی۔

بارش کے بعد شہر میں کرنٹ لگنے کاواقعہ بھی سامنے آیاہے۔منگھوپیر میانوالی کالونی میں کرنٹ لگنے سے ایک شخص چل بسا۔

شہر قائدمیں شارع فیصل اور اطراف میں تیز بارش کی وجہ سے شہریوں کو شدید مشکلات کا سامنا ہے۔اس سلسے میں فیروز آباد پولیس نے نرسری پل کے نیچے ریلیف کیمپ قائم کردیا ۔ ریلف کیمپ ایس ایس پی ایسٹ غلام اظفرکے حکم پر کیمپ قائم کیا گیا ہے جبکہ ایس ایچ او فیروزآباد اور دیگر اہلکار شہریوں کی مدد کے لیے موجود ہیں۔

ایس ایس پی ایسٹ کے مطابق شہری کسی بھی قسم کی مدد کے لیے کیمپ سے رابطہ کر سکتے ہیں۔ شارع پربند ہونے والی کئی گاڑیوں اور موٹر سائیکلوں کو اسٹارٹ کرنے میں پولیس کی مددطلب کی جاسکتی ہے۔ کسی بھی حادثے کی صورت میں ہیوی وہیکل لفٹر مشین بھی کیمپ پر موجودہیں۔