ایرانی سپریم لیڈر آیت  اللہ سید علی خامنہ ای نےخبردار کیا ہے کہ برطانیہ کی جانب سے ایرانی آئل ٹینکر کو اگر نہ چھوڑا گیا توایران کی جانب سے اس کا بھرپور جواب دیا جائے گا ۔

ایرانی میڈیا کے مطابق ایرانی سپریم لیڈر آیت اللہ علی خامنہ ای نے ٹی وی پر خطاب کرتے ہوئے کہا ہے کہ خدا کی مدد سے،اسلامی جمہوری ایران اور اس کی افواج اس قسم کے اوچھے ہتھکنڈوں  کو بغیرجواب دیئے نہیں چھوڑے گی ۔

ان کا مزید کہنا تھا کہ برطانیہ کی جانب سے  سمندری قوانین کی خلاف ورزی کی گئی ہے ، انہوں نے ہمارا آئل ٹینکر چوری کیا ہےجبکہ برطانیہ اسے قانونی قرار دے رہا ہے لیکن اسلامی جمہوریہ ایران اس کا بھرپور جواب دے گا   ۔

جبکہ اس سے پہلے ایرانی فوجی کمانڈر ، اور حکومتی  حکام کی جانب سے آئل ٹینکر کو چھوڑنے کا مطالبہ کیا گیا تھا اور سنگین نتائج کی دھمکیاں بھی دی تھیں  ۔

واضح رہے کہ ایرانی ٹینکر کو خام تیل شام لے جانے پر 4 جولائی کو برطانوی بحریہ نے تحویل میں لے لیا تھا ۔

  دوسری جانب پیر کو برطانیہ کے وزیر خارجہ جیریمی ہنٹ نے کہا تھا ایران مشرق وسطی  میں عدم استحکام پیدا کرنا چاہتا ہے جبکہ وہ مشرق وسطی میں پیدا ہونےوالے تناو کو ختم کرنا چاہتے ہیں  ۔

 اس سے پہلے ہفتے کو برطانیہ کے وزیر خارجہ جیریمی ہنٹ  کی جانب سے ایرانی تیل بردار بحری جہاز کو مشروط  طور پر چھوڑنے پرآمادگی ظاہر کی تھی کہ یہ جہاز یورپی یونین کی پابندیوں کی خلاف ورزی کرتے ہوئے شام کو تیل کی سپلائی نہیں کرے گا ۔

واضح  رہے کہ خلیج فارس میں حالیہ تناو اس وقت پیدا ہوا جب امریکی صدر ڈونلڈ ٹرمپ نے مئی 2018ء میں ایران سے طے شدہ جوہری سمجھوتے سے یک طرفہ طور پر دستبردار ہونے کا ا علان کردیا تھا اور اسی سال نومبر میں ایران کے خلاف سخت اقتصادی پابندیاں عاید کردی تھیں جن میں اس کی تیل کی برآمدات اور بینک کاری کے نظام کو ہدف بنایا گیا ہے۔