قطر میں طالبان اور افغان رہنماؤں کے درمیان ہونے والے دو روزہ مذاکرات کا میا بی سے ختم ہوگئے ہیں۔

جرمنی اور دوحہ کی مشترکہ میزبانی میں ہونے والے ان دو روزہ مذاکرات کا اختتام ایک مشترکہ اعلامیے پر ہوا،جس کے مطابق افغانستان میں اسلامی اُصولوں اور انسانی حقوق کے احترام اور سرکاری اداروں پر حملے نہ کرنے جیسے دیگر معاملات پر فریقین نے اتفاق کیا ہے۔

طالبان کے ترجمان سہیل شاہین نے ایک بیان میں کہا افغان سیاسی جماعتوں اور گروہوں کی خواہش ہے کہ ملک میں جلدی جنگ بندی کا اعلان کیا جائے لیکن افغان سرزمین سے غیر ملکی افواج کے انخلا تک ملک میں امن کی ضمانت نہیں دے سکتے۔

طالبان کے ترجمان کا مزید کہنا ہے کہ امریکا سے براہ راست مذاکرات کے ساتویں دور کا دوسرا سیشن آج ، منگل نو جولائی کو دوبارہ شروع ہو رہاہے۔ امریکا سے غیر ملکی افواج کی انخلا کی تاریخ لینے کے بعد جنگ بندی کا اعلان کیا جاسکتاہے۔ امریکا کا مطالبہ ہے کہ طالبان جنگ بندی کا اعلان کریں۔