مقبوضہ کشمیر میں آج مسلسل 19ویں روز بھی کرفیو برقرار ہے۔

تفصیلات کے مطا بق آرٹیکل 370 اے ختم کرنے کے بعد مقبوضہ کشمیر میں 19ویں روز بھی کرفیو جاری ہے،  مواصلات کا نظام مکمل طور پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں، بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

قابض بھارتی حکام کے مظالم کے خلاف گھروں میں نظر بند حریت رہنماؤں نے جمعے کو بڑے احتجاجی مارچ کی کال دے دی ہے۔

سڑکوں پر قابض بھارتی فورسز کی نفری بدستور تعینات ہے، احتجاج سے خوفزدہ قابض انتظامیہ نے سڑکیں بلاک کر رکھی ہیں۔

وادی میں لاک ڈاؤن کے باعث دواؤں اور کھانے پینے کی اشیاء کی شدید قلت ہو گئی ہے، احتجاج روکنے کے لیے اب تک 10 ہزار سے زائد کشمیریوں کو گرفتار کیا جا چکا ہے۔

واضح رہے کہ عیدالاضحیٰ کے موقع پر بھی مقبوضہ وادی میں کرفیو نافذ رہا جس کے باعث مسلمان عید کی نماز اور سنت ابراہیمی علیہ اسلام ادا کرنے سے محروم رہے۔

 پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کردیا تھا۔