امریکی سینیٹر برنی سینڈرنے ٹرمپ انتظامیہ سے مطالبہ کیا ہے کہ وہ مسئلہ کشمیر کے حل کے لیے اس بات کی حمایت کرے کہ اسے اقوام متحدہ کی قرار دادوں کے مطابق حل کیا جائے۔

امریکی شہر ہیوسٹن میں منعقدہ اسلامک سوسائٹی آف نارتھ امریکا کے سالانہ کنونشن سے خطاب کرتے ہوئے برنی سینڈرز نے بھارت کی انتہا پسند جنونی حکومت کے حالیہ اقدامات کی شدید مذمت کی اور واضح طور پر کہا کہ مودی حکومت کے اقدامات ناقابل قبول ہیں۔

انہوں  نے مطالبہ کیا کہ فی الفور مقبوضہ وادی کشمیر میں مواصلاتی رابطوں پر عائد پابندی کا خاتمہ کیا جائے، نافذ کرفیو ختم کیا جائے، مظلوموں کو اسپتالوں و ادویات تک رسائی دی جائے اور چھینے گئے بنیادی انسانی حقوق بحال کیے جائیں۔

برنی سینڈرز نے حکومت پر زور دیا کہ وہ مقبوضہ کشمیر میں انسانی حقوق کی بحالی کے لیے بھرپور آواز اٹھائے۔ ان کا کہنا تھا کہ مسئلہ کشمیر اقوام متحدہ کی قراردادوں کے مطابق پرامن طریقے سے حل کیا جائے۔