برطانوی شہزادہ ہیری نے اس خوف کا اظہار کیا ہے کہ کہیں ان کی والدہ لیڈی ڈیانا کی تاریخ اہلیہ میگن کے ساتھ نہ دہرائی جائے۔

گلف میڈیا نے ایک رپورٹ شائع کی ہے جس کے مطابق ایک ذاتی خط کی اشاعت پر شاہی خاندان کی بہو میگن مارکل نے برطانوی جریدے ’دی میل ‘ کے خلاف مقدمہ دائر کیا ہے۔

میگن مارکل نے ذاتیات پر حملہ کرنے پر برطانوی جریدے ’دی میل‘ کے خلاف قانونی کارروائی کا آغاز کردیا ہے۔ میگن مارکل کے وکلا نے بھی اشاعت کو غیر قانونی قرار دیا ہے۔ وکلا کے مطابق خط کی اشاعت کے ذریعے شاہی جوڑے کے خلاف جان بوجھ کر غلط اور توہین آمیز کہانیوں کی مہم چلائی جارہی ہے۔

جس کے بعد اپنے ایک جذباتی بیان میں شہزادہ ہیری نے اپنے خدشات کا اظہار کیا۔

شہزادہ ہیری نے اپنی والدہ لیڈی ڈیانا کا تذکرہ کرتے ہوئے لکھا کہ میرا سب سے بڑا ڈر یہی ہے کہ تاریخ خود کو دہرارہی ہے۔ میں جانتا ہوں کہ با اثر قوتیں کس طرح انسان کی ذاتی زندگی پر منفی اثرات مرتب کرتی ہیں۔

شہزادہ ہیری نے لکھا کہ ’میں نے اپنی ماں کو کھو دیا اور اب میں اپنی بیوی کو ان ہی طاقت ور قوتوں کا شکار ہوتے ہوئے دیکھتا ہوں۔‘

شہزادہ ہیری نے کہا کہ اخبار نے شاہی خاندان کی ذاتیات پر حملہ کرتے ہوئے عوام کو بہکانے کی کوشش کی ہے۔

تاہم دوسری جانب اخبار کی انتظامیہ نے شاہی جوڑے کے تمام الزامات کو مسترد کردیا ہے۔

اخبار کی انتظامیہ اپنے موقف پر ڈٹی نظرآئی ہے۔ ساتھ ہی یہ بھی کہا ہے کہ اپنے کیس کا بھرپور دفاع کریں گے۔