سعودی عرب کی وزارتی کونسل نے اس عزم کا اظہار کیا ہے کہ تیل کی عالمی مارکیٹ کی ضروریات کو پورا کیا جائے گا۔

عرب میڈیا کی رپورٹ کے مطابق سعودی دارالحکومت ریاض میں واقع  یمامہ پیلیس میں کابینہ کا اجلاس ہوا۔

سعودی فرمانروا شاہ سلمان بن عبدالعزیز کی صدرات ہونے والے اس اجلاس میں آرامکو کی تیل تنصیبات پر چودہ ستمبر کو حملوں کے بعد عالمی مارکیٹ میں تیل کی رسد کا جائزہ لیا گیا۔

عرب میڈیا نے رپورٹ میں بتایا کہ اجلاس میں سعودی عرب کے وزیرِ اطلاعات ترکی بن عبداللہ الشبانہ نے سعودی آرامکو کی بقیق اور الخریص میں واقع تنصیبات پر حملوں کی مذمت کی۔

وزیراطلاعات نے کہا کہ وہ اس حملے کو پورے خطے، عالمی سلامتی اورعالمی توانائی کی رسد کے لیے ایک خطرہ سمجھتے ہیں۔

عرب میڈیا نے رپورٹ میں  مزید بتایا کہ سعودی عرب اور روس میں تیل پیدا کرنے والے ممالک کے درمیان تعاون کے ایک سمجھوتے پر دست خط متوقع ہیں۔

یاد رہے کہ سعودی عرب کے وزیر توانائی شہزادہ عبدالعزیز بن سلمان نے روسی دارالحکومت ماسکو میں رواں ماہ ہونے والی توانائی کانفرنس  میں یہ اعلان کیا تھا کہ سعودی  مملکت تیل کی پیداوار کو مکمل طور پر بحال کرلیا ہے۔

سعودی وزیر نے کہا تھا کہ مملکت میں تیل کی موجودہ پیداواری صلاحیت روزانہ 11.3 ملین بیرل ہے۔

انہوں نے کہا  تھا کہ ہم آگے بڑھ کر حملوں کا صفحہ تبدیل کر چکے ہیں۔ ہمارے پاس آرامکو کی عوامی پیش کش اور کمپنی کے شیئرز کی فروخت جیسے نئے چیلنجز ہیں جن پرہم توجہ مرکوز کررہے ہیں۔آرامکو کمپنی نے سنہ2020ء میں اپنے مالکان کو 75 ارب ڈالر کا منافع تقسیم کرنے کا عزم کیا ہے۔

انہوں نے بتایا  تھاکہ آرامکو کی حصص اور منافع کی تقسیم کا حجم 2020 ء میں تقسیم کے لیے پیش کیا جا رہا ہے وہ سنہ 2018ء کی نسبت 29 فی صد زیادہ ہے۔

واضح رہے کہ  رواں برس 14 ستمبر کو  سعودی تیل تنصیبات پر ڈرون حملہ کیا گیا تھا۔ تاہم سعودی عرب اور امریکا نے ان حملوں کا ذمہ دار ایران کو ٹھہرایا ہے۔

ان حملوں کے بعد سے علاقے میں سخت کشیدگی ہے اور امریکہ نے خلیج اور سعودی عرب میں اپنے فوجیوں کی تعداد میں اضافہ کیا ہے۔ان الزامات کو ایران کی جانب سے مسترد کیا گیا ہے۔ ایران کا موقف ہے کہ الزامات کو ثابت کیا جائے۔