برطانیہ کی عدالت نے سابق ’’مس  ٹین  ‘‘ پرعسکریت پسندتنظیم داعش کےجنگجوسے شادی کرنے اوراس  کی مالی معاونت کرنےکا الزام عائدکیاہے۔

غیرملکی خبررساں  ادارےکےمطابق برطانیہ کے شہر لورپول کی مقامی عدالت  میں سابق ’مس ٹین‘امانی  نورپرعدالت نےشدت پسند تنظیم داعش کے جنگجو سے شادی کرنے اور تنظیم کو مالی معاونت فراہم کرنے کا الزام عائد کردیاہے ۔

برطانوی اخبارکےمطابق امانی نور کو چند دن قبل داعش کے ایک جنگجوسےشادی کرنے اور تنظیم کو فنڈ فراہم کرنے کے الزام میں گرفتار کیا گیا تھا۔

رپورٹ کے مطابق برطانوی دوشیزہ اور داعش جنگجو کا رابطہ بھی انٹرنیٹ پر ہوا تھا اور دونوں نے کبھی بھی ملاقات نہیں کی تھی، تاہم انٹرنیٹ پر تعلقات استوار ہونے کے بعد امانی نورنے 21  سال کی عمر میں میسیجنگ ایپلی کیشن ’ٹیلی گرام‘‘پرشادی کی تھی ۔

21 سالہ دوشیزہ پر داعش کو 35 پاؤنڈ یعنی پاکستانی 7 ہزار روپے سے زائد کی مالی معاونت کا الزام بھی ہے، جس سے انہوں نے انکار کرتے ہوئے کہا کہ انہوں نے داعش کی مالی معاونت نہیں کی بلکہ انہوں نے خانہ جنگی کے شکار ملک شام میں بچوں اور خواتین کے لیے خوراک خریدنے کے لیے پیسے فراہم کیے۔

سماعت کے دوران  کہ پولیس نے امانی نور کے گھر سے ترکی کا ایئر ٹکٹ بھی برآمد کیا جس کے ذریعے دوشیزہ ترکی کے راستے شام جاکر داعش میں شمولیت کا ارادہ رکھتی تھیں۔

تاہم امانی نورنےعدالت کو بتایا کہ ان کا داعش میں شمولیت کا کوئی ارادہ نہیں تھا، تاہم وہ اپنے شوہر کے پاس جانا چاہتی تھیں۔

عدالت نے سماعت کےبعدامانی نور کو ضمانت پررہاکرتےہوئے سماعت ملتوی کردی، سابق دوشیزہ کو آئندہ ہفتے تک سزا سنائے جانے کا امکان ہے۔

واضح رہےکہ امانی نور 18 سال کی عمر میں ’مس ٹین لور پول‘ منتخب ہوئی تھیں اوران کے تعلقات فٹ بالرشی اوگو سے بھی رہے ہیں۔

امانی نور کے فٹ بالر کے ساتھ تعلقات ’مس ٹین‘ منتخب ہونے سے قبل ہی تھے اور یہ اعزاز حاصل کرنے کے بعد دونوں کے تعلقات خراب ہونا شروع ہوئے جس کے بعد دوشیزہ نے 20 سال کی عمر میں داعش کے جنگجو سے آن لائن شادی کرلی۔