چین سےپھیلنے والا مہلک کرونا وائرس جان لیوا مرض میں تبدیل ہوگیا ہے۔ چین میں ہلاک اور متاثرہ افراد کی تعداد کروناوائرس پھیلنےسے مسلسل بڑھ رہی ہے جبکہ دیگر ملکوں میں بھی مریضوں میں اس وائرس کی تشخیص ہوئی ہے۔

تفصیلات کے مطابق چین میں کرونا وائرس سے مزید24 افراد ہلاک ہوگئے جس کے بعد مجموعی طور پر چین میں وائرس سے ہلاک افراد کی تعداد 106 ہوگئی۔

چینی حکام کاکہناہےکہ مزید 1300 نئے کیسز بھی رپورٹ ہوئے ہیں جن کے بعد چین میں مہلک وائرس سے متاثرہ افراد کی تعداد 4 ہزار سے زائد ہوگئی ہے۔ دارالحکومت بیجنگ میں بھی کرونا وائرس سے پہلی ہلاکت سامنے آئی ہے، وائرس سے ہلاک ہونے والی بچی کی عمر 9 ماہ تھی۔

جرمنی میں بھی کرونا وائرس کا پہلا کیس سامنے آگیا ہے۔ دوسری جانب امریکی محکمہ خارجہ نے اپنے شہریوں کو چین کے سفر پر نظرثانی کی ہدایت کی ہے ۔

گذشتہ روزچین میں مقیم پاکستانی طلباء کا ویڈیو بیان بول نیوز کو موصول ہوا۔ جس میں چینی صوبے یوہان کی انجینئرنگ اینڈ سائنس یونیورسٹی میں محصور پاکستانی طلباء نے چینی و پاکستانی حکام سے مدد کی اپیل کی ہے۔

یوہان کی انجینئرنگ اینڈ سائنس یونیورسٹی میں پاکستانی طلباوطالبات کی بڑی تعداد بھی زیر تعلیم ہے،کرونا وائرس کے باعث یوہان کا چین سے رابطہ منقطع ہوچکا ہے۔

پاکستانی طلباء کی جانب سے ویڈیو پیغام میں کہاگیا ہے کہ یوہان میں 12 جامعات کے 2 ہزارسے زائد پاکستانی طلباء و طالبات خوراک کی قلت کا شکار ہیں۔

پاکستانی طلباء نے وزیر اعظم پاکستان عمران خان  اور وزارت خارجہ شاہ محمود قریشی سے آفت زدہ صوبے سے نکلنے میں مددکرنے کی اپیل کردی۔

واضح رہے کہ کرونا وائرس سے متاثرہ یوہان صوبے کی یونیورسٹیز میں پڑھنے والے طالبعلموں کا تعلق پنجاب، سندھ اور خیبر پختونخوا سے ہے۔