ایرانی نائب وزیرصحت کےبعدنائب صدر برائےخواتین وخاندانی امورمیں بھی کروناوائرس کی موجودگی کی تصدیق ہوگئی ہے۔

 ایرانی میڈیارپورٹس کے مطابق ایران کی نائب صدربرائےخواتین وخاندانی امورمعصومہ ابتکارمیں کوروناوائرس کی تصدیق ہوگئی ہے تاہم ان کی حالت فی الحال زیادہ سنگین نہیں اور وہ گھر پر ہی ہیں۔

 دوسری جانب ترک خبرایجنسی نےدعویٰ کیا ہےکہ ایرانی پارلیمانی کمیٹی کےسربراہ مجتبیٰ زولنوربھی کروناوائرس کا شکار ہوئے ہیں۔

 خیال رہےکہ کرونا وائرس کےباعث ایران کےسابق سفیر 81سالہ سعید ہادی انتقال کرگئے ہیں ۔مقامی میڈیا کےمطابق وہ تہران کے اسپتال میں زیرعلاج تھے۔

سعید ہادی ویٹی کن میں بطورسفیرخدمات انجام دے چکے ہیں۔

دوسری جانب ایران میں کورونا وائرس کے تیزی سے بڑھتے ہوئے کیسز کے بعد حفاظتی اقدامات کے تحت نماز جمعہ کے اجتماعات منسوخ کردیے گئے ہیں  ۔

ایرانی خبررساں ادارے کے مطابق ترجمان وزارت صحت کا کہناہے کہ کورونا وائرس کے بڑھتے خطرات کے باعث 31 صوبوں کے  23 دارالحکومتوں اور متاثرہ علاقوں میں نماز جمعہ کے تمام اجتماعات  منسوخ کردیے گئے ہیں۔

ترجمان کے مطابق ایران کے شہر قُم اور مَشہد کی مساجد میں صرف نمازکی اجازت ہےجب کہ اجتماعات پرپابندی عائد کردی گئی ہے۔

ترجمان کاکہناتھاکہ متاثرہ علاقوں میں تعلیمی اداروں سمیت سنیما،پارکس اوردیگرپبلک مقامات بندرکھنےکافیصلہ کیاگیاہےجبکہ کانفرنسزاورایونٹس بھی منسوخ کردیےگیے ہیں۔

ایرانی وزارت صحت کےترجمان نےمزید کہا کہ کورونا وائرس کی تشخیص کےلیے 15 میڈیکل لیبس قائم کردی ہیں جوآئندہ ہفتےتک کھول دی جائیں گی۔

واضح رہےکہ  کرونا وائرس کے باعث ایران میں اب تک 26 ہلاکتیں ہوچکی ہیں جبکہ مہلک وائرس نے 245 افراد کو متاثر کیا ہے۔