کورونا نے روایتی اور سماجی  تقریبات پر اپنے اثرات دکھانا شروع کردیئے ہیں جس کی زد میں آکر برطانیہ کی قدیم ترین روایت کو تبدیل کردیا  ہے۔

ملکہ برطانیہ کی سالگرہ پر کئی دہائیوں سے دی جانے والی توپوں کی روایتی سلامی اس سال نہیں دی جائے گی ۔

دوسری جانب برطانوی شہزادی کی شادی منسوخ کردی گئی ہے جبکہ سویڈین کی شہزادی کورونا مریضوں کے لیے خدمات انجام دینے کے لیے نرس بن گئیں۔

ملکہ برطانیہ کی 94 ویں سالگرہ پر جو کہ اکیس اپریل کو منائی جائے گی برطانوی شاہی محل کی روایت رہی ہے کہ ملکہ کی سالگرہ پر انہیں شاہی توپ کی سلامی دی جاتی ہے لیکن اس بار کورونا وائرس کی بدولت اسے منسوخ کردیا گیا ہے اور ایسا گزشتہ اڑسٹھ سال میں پہلی بار ہوگا کورونا وائرس کا خوف سماجی تقریبات کو بھی متاثر کرنے لگا ہے۔

برطانوی ملکہ کی پوتی شہزادہ اینڈریو کی بیٹی شہزادی بیٹرس کی شادی منسوخ ہوگئی اور ان کے دلہن بننے کے خواب چکنا چور ہوگئے  شاہی محل نے  انکی شادی کی منسوخ کا باقاعدہ اعلان کردیا ہے اور اب یہ کب ہوگی اس کے لیے ان کو کورونا وائرس کے ختم ہونے کا انتظار کرنا پڑے گا۔

کورونا نے ایک اور کام کیا اور بڑی بڑی شخصیات کو انسانی خدمت پر لگا دیا اور لوگ انسانیت کی خدمت کے لیے میدان میں کود پڑے، ایسا ہی کیا سوئس شہزادی صوفیہ نے اور کورونا مریضوں کی خدمت کے لیے وہ نرس بن گئیں۔

اس کے لیے شہزادی نے آن لائن تربیت حاصل کی۔۔۔ اور اسٹاک ہوم کے اسپتال میں مریضوں کی دیکھ بھال کے لیے خود کو وقف کرلیا۔