سعودی عرب میں آج عیدالفطرمنائی جارہی ہے، مکہ مکرمہ حرم شریف اور مسجد نبویؐ میں نماز عید کے اجتماعات ہوئے۔

تفصیلات کے مطابق حرم شریف اور مسجد نبویؐ میں سماجی فاصلوں کے ساتھ نمازعید کی ادائیگی کی گئی جس میں حرم میں کام کرنے والے کارکنان، آئمہ، شیوخ اور سیکیورٹی اہلکار شریک ہوئے۔

نمازعید میں حرم شریف میں شیخ صالح الحمید کی آواز میں امامت ہوئی اور انہوں نے مختصرآیات تلاوت کیں،  امام حرم نے کورونا سے نجات کیلئے دعائیں مانگیں اورعید کی اہمیت پر بھی روشنی ڈالی۔

گورنر مکہ، خادم حرمین اور ولی عہد نے اپنی اپنی رہائش گاہوں پر نماز ادا کی۔

دوسری جانب مسجد نبویؐ میں شیخ عبداللہ نے عید کا خطبہ دیا اور سماجی فاصلے کے ساتھ نمازعید کی ادائیگی کی جب کہ مخصوص افراد نے عید کی نماز میں شرکت کی۔

خیال رہے کہ سعودی عرب میں کورونا وائرس کے پھیلاو کوروکنے کے سبب کرفیو نافذ ہے۔