امریکی صدر جوبائیڈن 15 نومبرکو چین کے صدر شی جن پنگ سے ورچوئل ملاقات کریں گے۔

وائٹ ہاؤس  سے جاری بیان میں امید ظاہر کی گئی ہے کہ اس ملاقات سے دنیا کی دو بڑی معیشتوں کے درمیان بڑھتے ہوئے تناؤ میں کچھ استحکام پیدا ہوگا۔

9 ستمبر کو دونوں رہنماؤں کے درمیان ہوئے ٹیلی فونک رابطے کے بعد یہ ملاقات بائیڈن انتظامیہ کے زیر انتظام اب تک کی سب سے وسیع ملاقات متوقع کی جارہی ہے۔

اس سے قبل جوبائیڈن نے امریکی صدارت سنبھالنے کے بعد ستمبر میں چینی صدر سےدوسری مرتبہ ٹیلی فونک گفتگو کی تھی جو 90 منٹ تک جاری رہی تھی۔

گفتگو کے دوران دونوں صدور نے دنیا کی دو بڑی معیشتوں کے مابین مقابلے کو تنازعات میں تبدیل ہونے سے بچانے کی ضرورت پر تبادلہ خیال کیا تھا۔

وائٹ ہاؤس کی جانب سے بیان میں مزید کہا گیا ہے کہ دونوں صدور مسابقت  کے ذمہ دارانہ انتظام سے متعلق پہلوؤں پر تبادلہ خیال کریں گے۔

وائٹ ہاؤس کا کہنا ہے کہ دونوں رہنما اپنے مشترکہ مفادات کی صورت میں مل کر کام کرنے کے حوالے سے بھی بات  چیت کریں گے۔

امریکی صدر  کی جانب سے چینی صدر کو اپنے منصوبے اور ترجیحات واضح جائیں گی اور چین کے حوالے سے اپنے تحفظات سے بھی آگاہ کیا جائے گا۔