ایرانی صدر ابراہیم رئیسی نے کہا ہے کہ کسی بھی قسم کی دشمنانہ کارروائی کا جواب دیا جائے گا اور یہ جواب توازن کو بدل کر رکھ دے گا۔

پاسداران انقلاب کے سربراہ نے 20 تا 24 دسمبر کو خلیج فارس میں ہونے والی ’’عظیم پیغمبر 17‘‘ مشق کے موقع پر مبارکباد کا پیغام جاری کیا ہے۔ پاسداران انقلاب کے سربراہ نے اپنے پیغام میں فوج کو خراج تحسین بھی پیش کیا۔

ایرانی صدر ابراہیم رئیسی نے مزید کہا کہ دشمن کی طرف سے کوئی بھی جارحانہ کارروائی ایرانی مسلح افواج کے جامع اور پُرعزم ردعمل سے دوچار ہوگی۔

ایرانی صدر ابراہیم رئیسی کا یہ بیان اسرائیلی حکام کی جانب سے ایران کی جوہری تنصیبات کے خلاف فوجی آپریشن کی دھمکیوں کے بعد سامنے آیا ہے۔

اسرائیلی قیادت وقتاً فوقتاً دھمکیاں دیتی رہتی ہے کہ اگر ایران نے جوہری ہتھیاروں کے حصول کی کوششیں جاری رکھیں تو وہ ایران کی جوہری تنصیبات پر فوجی کارروائی شروع کر دے گی۔

اسرائیلی وزیر دفاع بینی گانٹز نے 20 دسمبر کو کہا تھا کہ اقتصادی مشکلات کی وجہ سے ایران کا ہاتھ کمزور ہے۔ جوہری مذاکرات میں ایران کی تاخیری حکمت عملی کے خلاف جلد ہی کھلے اور ڈھکے چھپے اقدامات کو وسعت دی جائے گی۔

اسرائیلی صدر اسحاق ہرزوگ نے ​​بھی 22 دسمبر کو کہا تھا کہ ایرانی جوہری خطرے کو کسی معاہدے کی پابندی یا اس کے بغیر مُستقل طور پر بے اثر ہونا چاہیے۔