روس کے صدر ولادیمیر پیوٹن نے امریکا اور نیٹو سے فوری مذاکرات کی خواہش کا اظہار کیا ہے۔

اے ایف پی کے مطابق آج روسی صدر پیوٹن اور فن لینڈ کے صدر ساولی نی انستو کے درمیان فون پر رابطہ ہوا۔ گفتگو کے دوران فن لینڈ کے صدر نے یوکرائنی سرحد پر کشیدہ صورتحال کے حوالے سے تشویش کا اظہار کیا۔

صدر پیوٹن کا کہنا تھا کہ بین الاقوامی سطح پر قانونی ضمانت کے لیے امریکا اور نیٹو سے فوری طور پر مذاکرات شروع کرنے کی ضرورت ہے۔

صدر ولادیمیر پیوٹن نے مغربی ممالک سے یقین دہانی کا مطالبہ کیا ہے کہ نیٹو مشرق کی جانب پیش قدمی نہیں کرے گی۔

روسی صدر نے یوکرائنی قیادت پر الزام عائد کیا کہ وہ مشرقی علاقے میں روس نواز باغیوں کے خلاف بھاری ہتھیار اور مسلح ڈرون استعمال کر رہی ہے۔

صدر پیوٹن کی جانب سے یہ بیان ایسے موقع پر سامنے آیا ہے جب مغربی ممالک کئی ہفتوں سے روس پر الزام عائد کر رہے ہیں کہ وہ یوکرائن پر قبضے کا منصوبہ بنا رہا ہے جبکہ روس ایسے کسی بھی منصوبے کے الزام کو مسترد کرتے ہوئے خطے میں بڑھتی کشیدگی کا ذمہ دار نیٹو کو ٹہراتا ہے۔

گزشتہ ہفتے امریکی صدر جو بائیڈن نے وڈیو کال میں صدر پیوٹن کو خبردار کیا تھا کہ یوکرائن پر حملے کی صورت میں روس پر ایسی غیر معمولی پابندیاں لگائی جائیں گی جو پہلے کبھی نہیں لگائی گئیں۔

یورپی یونین کے وزرائے خارجہ کے اجلاس اور جی سیون ممالک کے وزرا کے مذاکرات میں بھی روس کو معاشی پابندیوں سے خبردار کیا گیا تھا۔

فن لینڈ ماضی میں بھی مغربی ممالک اور روس کے درمیان رابطوں کے لیے غیر جانبدار فریق کا کردار ادا کرتا رہا ہے۔

2018 میں سابق امریکی صدر ڈونلڈ ٹرمپ اور صدر ولادیمیر پیوٹن کے درمیان ملاقات کا اہتمام فن لینڈ میں ہی کیا گیا تھا۔