آگرہ: مغل شہنشاہ شاہجہاں کے عرس کے موقع پر تاج محل پاکستان زندہ باد کے نعروں سے گونج اٹھا ہے۔

غیر ملکی خبر رساں ادارے کے مطابق آگرہ میں مغل شہنشاہ شاہجہاں کا تین روزہ 367 واں عرس 27 فروری سے جاری تھا۔

اس موقع پر تاج محل کے مرکزی گنبد کے نیچے تہہ خانے میں واقع ممتاز اور شاہجہاں کی قبروں کو کھول دیا گیا تھا جبکہ اس دوران سیاحوں کا داخلہ مفت رکھا گیا تھا۔

عرس کے تیسرے یعنی یکم مارچ بروز منگل کو افراتفری کا ماحول اس وقت پیدا ہوا جب ایک شخص نے پاکستان کے حق میں نعرے بلند کردیے۔

ہجوم میں موجود ایک شخص نے زور دار آواز میں ’’پاکستان زندہ باد‘‘ کے نعرے لگانا شروع کردیے جس پر وہاں موجود لوگوں نے اسے پکڑ کر بہیمانہ تشدد کا نشانہ بنایا۔

بعد ازاں افراتفری کا ماحول دیکھ کر سیکیورٹی اہلکار بھی وہاں پہنچ گئے جس کے بعد لوگوں نے اس شخص کو ان کے حوالے کردیا لیکن پھر سیکیورٹی اہلکاروں نے بھی اس شخص پر ظالمانہ انداز میں تشدد کیا۔

میڈیا رپورٹس کے مطابق یہ واقعہ منگل کی شام عرس کے موقع پر اس وقت پیش آیا جب تاج محل میں مفت داخلے کی وجہ سے لوگوں کا ہجوم موجود تھا اور تاج محل کے مشرقی اور مغربی دروازوں پر لمبی قطاریں لگی ہوئی تھی۔