چین کے وزیر دفاع نے اپنے امریکی ہم منصب کو خبردار کرتے ہوئے کہا ہے کہ اگر تائیوان نے آزادی کا اعلان کیا تو چین جنگ شروع کرنے میں ہچکچاہٹ محسوس نہیں کرے گا۔ حالیہ مہینوں میں چین اور امریکا کے درمیان تائیوان کے معاملے پر کشیدگی میں اضافہ ہوا ہے۔

فرانسیسی خبر رساں ادارے اے ایف پی کے مطابق گزشتہ روز چین کے وزیر دفاع وی فینگ نے سنگاپور میں منعقدہ شنگریلا ڈائیلاگ سکیورٹی اجلاس کے موقع پر امریکی وزیر دفاع لائیڈ آسٹن سے براہ راست ملاقات میں اُنہیں یہ انتباہ دیا ہے۔

چینی وزیر دفاع نے کہا کہ اگر کوئی تائیوان کو چین سے الگ کرنے کی جرات کرتا ہے تو چین کی فوج بھی جنگ شروع کرنے میں ہچکچاہٹ محسوس نہیں کرے گی۔ چین کی وزارت دفاع کے مطابق وزیر دفاع وی فینگ نے اس عزم کا اظہار کیا کہ چین تائیوان کو اس سے الگ کرنے کی سازش کو ناکام بنا دے گا۔ واضح رہے کہ چین تائیوان کو اپنا علاقہ قرار دیتا ہے۔

ملاقات میں امریکی وزیر دفاع نے لائیڈ آسٹن نے آبنائے تائیوان میں امن و استحکام کی اہمیت پر زور دیا اور تائیوان کی موجودہ حیثیت میں یک طرفہ تبدیلیوں کی مخالفت کی۔ امریکی محکمہ دفاع کے مطابق انہوں نے کہا کہ چین تائیوان کے خلاف عدم استحکام پیدا کرنے والے اقدامات سے باز رہے۔

یاد رہے کہ گزشتہ ماہ جاپان کے دورے کے موقع پر امریکی صدر جو بائیڈن نے بھی کہا تھا کہ اگر چین نے تائیوان پر حملہ کیا تو امریکا تائیوان کا دفاع کرے گا۔ امریکی صدر کے بیان کے ردعمل میں چین نے کہا تھا کہ امریکا آگ سے کھیل رہا ہے۔

چین کی کونسل برائے تائیوان امور کے ترجمان ژو فینگلین کہا تھا کہ امریکا چین پر قابو پانے کے لیے تائیوان کارڈ کھیل رہا ہے مگر وہ خود اپنی لگائی آگ میں جل جائے گا۔