امریکہ نے سابق وزیر اعظم عمران خان پر مقدمے  کو پاکستان کا اندرونی معاملہ قراردیا ہے۔

امریکی اسٹیٹ ڈپارٹمنٹ کے ترجمان نیڈ پرائس کا  پریس بریفنگ کےدوران کہنا تھا کہ سابق وزیر اعظم عمران خان پر لگنے والے الزامات سے آگاہ ہیں۔

انہوں نے کہا کہ یہ پاکستان کے قانونی اور عدالتی نظام کا معاملہ ہے، اس معاملے کا  براہ راست امریکہ  سے  کوئی تعلق نہیں ہے۔

نید پرائس کا کہنا تھا کہ  پاکستان میں کسی سیاسی جماعت کےدوسری سیاسی جماعت کے مقابل آنے پر امریکہ کوئی موقف نہیں رکھتا۔ ہم پاکستان اور دنیا بھر میں جمہوری، آئینی اور قانونی اصولوں کو پر امن طور پر برقرار رکھنے کی حمایت کرتے ہیں۔

دوسری جانب اقوام  متحدہ  نے سابق وزیر اعظم عمران خان پر دہشت  گردی کے مقدمے کا نوٹس لے لیا ہے۔

عرب میڈیا کو انٹرویو  دیتے ہوئے اقوام متحدہ کے ترجمان اسٹیفنی ڈوجیرک  نے کہا  ہےکہ سربراہ اقوام متحدہ  انتونیو گوتریس پاکستان کے سابق وزیراعظم عمران خان کے خلاف لگائے الزامات سے آگاہ ہیں۔

انہوں نے بتایا کہ  اقوام متحدہ کے سربراہ نے آزاد اور غیر جانبدارانہ طریقے سے قانونی کارروائی کرنے پر زور دیا ہے۔

سربراہ اقوام متحدہ نے پرسکون رہنے، تناؤ کو کم کرنے اور قانون کی حکمرانی کے ساتھ انسانی حقوق اور بنیادی آزادیوں پر زور دیا ہے۔

عمران خان کیخلاف انسداد دہشت گردی ایکٹ کے تحت مقدمہ درج

پاکستان تحریک انصاف (پی ٹی آئی) کے  چیئرمین  عمران خان  کے خلاف 21 اگست کو انسداد دہشت گردی ایکٹ کے تحت اسلام آباد کے تھانہ مارگلہ میں  مقدمہ درج کیا گیا تھا۔

عمران خان پر ایف نائن پارک جلسے میں ایڈیشنل سیشن جج کو دھمکانے  کاالزام عائد کیا گیا تھا۔

عمران خان کی حفاظتی ضمانت منظور

گزشتہ روز  اسلام آباد ہائی کورٹ نے عمران خان کی  ضمانت   کی درخواست منظورکرتے ہوئے تین روز کی حفاظتی ضمانت دے دی تھی۔

عدالت نے پولیس کو سابق وزیر اعظم کی گرفتاری سے روک دیا  گیا تھا ۔