سعودی عرب کے ولی عہد محمد بن سلمان کا کہنا ہے کہ فلسطینیوں کی امنگوں کے مطابق  منصفانہ اور دیرپا امن کے حصول کے لیے سعودی عوام ان کے ساتھ کھڑی ہے ۔

سعودی میڈیا کی رپورٹ کے مطابق  سعودی عرب کے ولی عہد محمد بن سلمان کی فلسطینی صدر محمود عباس سے فون پر بات چیت  ہوئی۔

اس موقع پر محمد بن سلمان نے کہا کہ  سعودی عرب کشیدگی کو روکنے کے لیے تمام بین الاقوامی فریقوں کے ساتھ ہر ممکن کوشش کر رہا ہے۔

انہوں نے کہا کہ سعودی عرب فلسطینی عوام کے ساتھ ان کے جائز حقوق کے حصول، باوقار زندگی کے لیے جدوجہد کے لیے ساتھ موجود ہے۔

فلسطینی صدر نے سعودی عرب کے ثابت قدم موقف اور فلسطینی عوام کے ساتھ کھڑے ہونے کو سراہا۔

اس کے علاوہ غزہ کی صورتحال کے حوالے سے سعودی ولی عہد شہزادہ محمد بن سلمان  نے مصری صدر عبد الفتاح السیسی اور اردن کے فرمانروا شاہ عبدللہ ثانی سے  بھی ٹیلی فونک رابطہ  کیا۔

تینوں رہنماؤں کے درمیان غزہ اور گردو نواح میں بڑھتی ہوئی فوجی کشیدگی اور بگڑتی ہوئی صورتحال پر تبادلہ خیال کیا  گیاجس سے شہریوں کی زندگی اور خطے کی سلامتی اور استحکام کو خطرہ لاحق ہے۔

سعودی ولی عہد شہزادہ محمد بن سلمان،مصری صدر عبدالفتاح السیسی اور فرمانروا عبداللہ ثانی نے رابطے کے دوران غزہ اور گردونواح میں بڑھتی ہوئی کشیدگی اور خطے میں اسے پھیلنے سے روکنے کےلیے بین الاقوامی اور علاقائی کوششوں کو تیز کرنے کی ضرورت پراتفاق کیا ۔

شہزادہ محمد بن سلمان نے اس بات کا اعادہ کیا کہ سعودی عرب فلسطینی عوام کے جائز حقوق کے حصول، ان کی امیدوں اور امنگوں کو پورا کرنے، منصفانہ اور دیرپا امن کے حصول کے لیے ان کے ساتھ کھڑا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/world/2023/10/245106/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/world/2023/10/245106/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں