اسرائیل کے غزہ میں وحشیانہ حملے جاری ہیں جس کے نتیجے میں گذشتہ 24 گھنٹوں کے دوران 74 فلسطینی شہید ہوگئے۔

غیر ملکی خبر رساں ادارے کی رپورٹ کے مطابق اسرائیل کی جانب سے غزہ میں وحشیانہ حملوں کا سلسلہ جاری ہے جب کہ شمالی غزہ میں اسرائیلی فورسز کا 18ویں روز بھی محاصرہ جاری رہا۔

جنوبی غزہ میں صہیونی فورسز کے حملوں سے 4 افراد شہید اور متعدد زخمی ہوگئے، شمالی غزہ کے بیت احیہ پر بمباری سے 7 افراد لقمہ اجل بنے۔

مقبوضہ مغربی کنارے میں اسرائیلی فورسز کے ہاتھوں ایک 11 سالہ بچہ شہید ہوگیا، وسطی غزہ کے دیر البلاح میں ایک شہری گاڑی پر دھماکے سے 2 فلسطینی شہید ہوئے۔

فلسطینی وزرات صحت کے مطابق غزہ میں گذشتہ 24 گھنٹوں کے دوران 74 فلسطینی شہید جب کہ 130 زخمی ہوئے ہیں جب کہ وسطی غزہ میں اسرائیلی بمباری سے اقوام متحدہ کا ایک اور اہلکار مارا گیا ہے۔

واضح رہے کہ غزہ میں جاری مظالم کے نتیجے میں شہدا کی تعداد 42 ہزار 792 ہوگئی جب کہ ایک لاکھ 412 سے زائد زخمی ہوچکے ہیں جن میں بڑی تعداد خواتین اور بچوں کی ہے۔