امریکی صدر ڈونلڈ ٹرمپ کو یقین ہے کہ سعودی عرب اسرائیل کے ساتھ تعلقات کوجلد ہی معمول پر لائے گا اور امن معاہدے”ابراہیم ایکارڈ” کی طرف آجائے گا۔

امریکی میگزین سے گفتگو میں ٹرمپ نے اپنے اس دعوے کی تائید میں 2020 میں اپنی پہلی مدت کے اختتام پر ہونے والے معاہدے کاحوالہ دیا،جس کے بعد متحدہ عرب امارات، بحرین، سوڈان اور مراکش اسرائیل کے ساتھ تعلقات کو معمول پر لے آئے تھے۔

امریکی صدر نے زوردیتے ہوئے کہاکہ اب کی بار بھی ایسا ہی ہو گا، ٹرمپ اگلے ماہ مشرق وسطیٰ کے دورے پر سعودی عرب کا دورہ کرنے والے ہیں جودوبارہ اقتدار سنبھالنے کے بعد ان کا پہلا بیرون ملک دورہ ہوگا۔

ڈونلڈ ٹرمپ پوپ فرانسس کی آخری رسومات کے لیے سب سے پہلے اٹلی جائیں گے۔انہوں نے اپنی پہلی مدت میں ریاض کے ساتھ قریبی تعلقات استوار کیے تھے۔

توقع کی جارہی ہے کہ امریکی سعودی عرب کو خارجہ پالیسی کے ایک بڑے مقصد کے طور پراسرائیل کے ساتھ تعلقات کو معمول پر لانے کی طرف آمادہ کریں گے۔

غزہ کی صورتحال  نے  اس بار ٹرمپ کی کوششوں کو پیچیدہ بنا دیا ہے اور سعودی رہنماؤں نے فلسطینی ریاست کو تسلیم کیے بغیر اسرائیل کے ساتھ تعلقات کو معمول پر لانے کو مسترد کر دیا ہے۔