امریکی صدر ڈونلڈ ٹرمپ  نے مسلسل تیسری بار خطے میں امن کے لیے پاکستان کے کلیدی کردار کو عالمی سطح پر سراہتے ہوئے کہا کہ پاکستان کو نظر انداز نہیں کرسکتے، پاکستانی لوگ نہ صرف ذہین ہیں بلکہ پاکستان معیاری مصنوعات بنانے والا ملک ہے۔

فاکس نیوز کو دیے جانے والے انٹرویو میں امریکی صدر ڈونلڈ ٹرمپ نے کھل کر پاکستان کی تعریف کی اور اعتراف کیا کہ پاکستان نے جنگ کے بجائے تجارت کو ترجیح دے کر عالمی قیادت کا ثبوت دیا۔

یہ بھی پڑھیں: امریکی صحافی نک رابرٹسن نے سیز فائر سے متعلق تفصیلات بتادیں

انہوں نے کہا کہ پاک بھارت کشیدگی ایٹمی جنگ  کے قریب پہنچ چکی تھی، ہم نے ممکنہ ایٹمی تصادم کو روک کر خطے میں امن قائم رکھا، پاکستان کا کردار قابلِ تعریف ہے۔

امریکی صدرکا یہ بھی کہنا ہے کہ پاکستان نے تجارت کی پیشکش خوش دلی سے قبول کی، جو خطے میں استحکام کی علامت ہے، پاکستان کے ساتھ زبردست بات چیت ہوئی، ہم انہیں نہیں بھول سکتے۔

دفاعی ماہرین کا کہنا ہے کہ پاکستان نے خطے میں امن کے لیے اہم اور دلیرانہ اقدام اٹھایا، مودی کی جنگی پالیسیاں خطے کے امن کے لیے سب سے بڑا خطرہ ہیں، بھارت نے پہلے جنگ بندی کی اپیل کی، پھر ہٹ دھرمی سے ٹرمپ کو نشانہ بنایا۔

دفاعی ماہرین نے مزید یہ بھی کہا کہ مودی سرکار کی جنگی سوچ نے بھارت کو عالمی سطح پر جگ ہنسائی کا باعث بنایا، اس سے قبل امریکی صدر ٹرمپ ایپل کے سی ای او کو سرمایہ کاری سے روک چکے ہیں جو بھارتی معیشت کیلئے دھچکا ہے۔