اسرائیل کی جانب سے غزہ کے لیے امدادی فلوٹیلا کو روکے جانے کے خلاف اٹلی بھر میں جمعے کے روز ایک روزہ ملک گیر ہڑتال کی گئی، جس کے نتیجے میں ٹرینوں کی آمد و رفت اور بندرگاہوں پر معمولات زندگی متاثر ہوئے جب کہ لاکھوں افراد نے سڑکوں پر نکل کر احتجاجی مظاہرے کیے۔

یہ ہڑتال اٹلی کی بڑی مزدور یونین CGIL کی جانب سے دی گئی کال پر کی گئی، جس نے 100 سے زائد شہروں میں مظاہروں کا اعلان کیا تھا۔

روم میں مظاہرین نے مرکزی پیاتزا وٹوریو سے ریلوے اسٹیشن تک مارچ کیا، اس دوران فلسطینی پرچم، یونین کے بینرز اور “نسل کشی بند کرو جیسے نعرے نمایاں تھے۔

ہڑتال کی وجہ سے اٹلی کے ریلوے نظام میں شدید خلل پڑا، متعدد ٹرینیں منسوخ ہوئیں یا تاخیر کا شکار ہوئیں، تاہم روم اور میلان میں میٹرو سروس محدود پیمانے پر جاری رہی۔ ہوائی اڈوں پر بھی جزوی اثرات دیکھے گئے۔

سیپیینزا یونیورسٹی روم کے ماہرِ عمرانیات ماتیا دیلیتی کے مطابق فلسطینی کاز اٹلی میں ہمیشہ ایک سیاسی حساسیت کا باعث رہا ہے، خاص طور پر بائیں بازو اور کیتھولک آبادی کے درمیان۔

اطلاعات کے مطابق ہفتہ کے روز روم میں ایک بڑا احتجاجی جلسہ متوقع ہے، جو کہ کئی دنوں سے جاری مظاہروں کی آخری کڑی ہوگا۔ جمعرات کی رات روم میں کولوسیم سے ہزاروں افراد نے پُرامن مارچ کیا۔

تاہم تورین میں ایک کانفرنس سینٹر کو نقصان پہنچایا گیا اور میلان میں تاریخی گرجا گھر ڈوومو کے باہر نصب ایک مجسمے پر سرخ رنگ پھینکا گیا اور وال چاکنگ کی گئی۔

قومی ہڑتال مانیٹرنگ باڈی نے ہڑتال پر اعتراض کرتے ہوئے کہا ہے کہ یونینز نے مقررہ مدت سے پہلے اطلاع نہیں دی، جو قوانین کی خلاف ورزی ہے۔