پنجاب بھر میں ایک ہفتے بعد کل صرف 12 گھنٹے کے لیے سی این جی اسٹیشنز کو گیس فراہم کی جائے گی۔

تفصیلا ت کے مطابق ترجمان سوئی ناردرن  نے اپنے ایک بیان میں کہا ہے کہ کل سے صوبائی دارالحکومت لاہور سمیت پنجاب بھر کے سی این جی اسٹیشنز پر صبح 8 بجے سے رات 8 بجے تک گیس دستیاب ہوگی۔

سردی کی وجہ سے سوئی گیس کی طلب زائد ہونے پر سی این جی سیکٹر کو ہفتے میں صرف ایک روز کے لیے گیس فراہم کی جارہی ہے جبکہ آئندہ ہفتے گیس فراہمی کا شیڈول بعد میں جاری کیا جائے گا ۔

سی این جی ایسوسی ایشن کے صدر غیاث عبداللہ پراچہ نے ہفتے میں ایک روز کے لیے گیس فراہمی کو معاشی قتل قرار دیتے ہوئے کہا کہ سی این جی سیکٹر پہلے ہی تباہی کے دہانے پر پہنچ چکا ہے جب کہ عوام کو بھی سستا فیول دستیاب نہیں ہو رہا۔

 سی این جی ایسوسی ایشن کے صدر غیاث عبداللہ پراچہ نے وزارت پٹرولیم و قدرتی گیس سے مطالبہ کیا کہ کم از کم ہفتہ میں چار سے پانچ روز گیس بلاتعطل فراہم کی جائے تاکہ سی این جی اسٹیشن پر کام کرنے والے ہزاروں افراد بے روزگار نہ ہوں۔

پانچ دن کی بندش کے بعد سی این جی اسٹیشن کھل گئے

واضح رہے کہ  صوبے  سندھ بھر میں پانچ دن کی بندش کے بعد سی این جی اسٹیشن آج صبح  کھل گئے تھے۔

کراچی سمیت سندھ بھر میں سی این جی اسٹیشن صح 8 بجے سے رات آٹھ بجے تک کے لیے کھول دیئے گئے، حکام کی جانب سے سی این جی اسٹیشن پانچ دن کی بندش کے بعد محض 12 گھنٹو ں کے لیے کھولے گئے ہیں۔

ایس ایس جی سی ترجمان کی جانب سے موقف اپنا یا گیا تھا کہ ایس ایس جی سی کومختلف گیس فیلڈز سے ملنے والی گیس کی مقدارکم موصول ہو رہی ہے جس  کے سبب لائن پیک سخت متاثر ہے۔

گزشتہ دن ایس ایس جی سی  ترجمان نے اپنے موقف میں کہا  تھاکہ سی این جی صارفین کی مشکلات کو سامنے رکھتے ہوئے کل بروز اتوار صبح 8 بجے سے رات 8 بجے تک12گھنٹے  کے لیےسندھ بھر میں تمام سی این جی اسٹیشنز کو گیس کی سپلائی جاری رکھی  جائےگی۔