صدر آل پاکستان انجمن تاجران اجمل بلوچ نے حکومت سےکہا ہے کہ  تاجروں کا مزید امتحان نہ لیا جائے۔

آل پاکستان انجمن تاجران کی جانب سے جاری کردہ پریس ریلیز  کے مطابق  صدر اجمل بلوچ  نے حکومت سے مطالبہ کیا ہے کہ  حکومت تاجروں کو بے یارو مدد گار نہ چھوڑے اور لاک ڈاؤن میں فی الفور نرمی کرے۔

صدر آل پاکستان انجمن تاجران کا کہنا ہے کہ  تاجر واحد سفید پوش طبقہ ہے جو ہاتھ نہیں پھیلا سکتا اس کا خیال رکھنا حکومت کا فرض ہے۔

اجمل بلوچ  نے  کہا  کہ ایک ماہ دس دن تاجروں نے دکانیں بند رکھی ہیں ،اب ان کا مزید امتحان نہ لیا جائے۔ تاجر وں نے کورونا کو روکنے کے لیے اپنے آپ کو قربان کیا لیکن اب تاجر وں میں سکت نہیں رہی ہے۔

انہوں نے کہا کہ  اگر رات دن دکانیں کھولنے کی اجازت دے دی جائے تو دکانوں میں رش بالکل بھی نہیں ہوگا۔

صدر آل پاکستان انجمن تاجران کا کہنا ہے کہ  مسلم لیگ ن اور پاکستان پیپلز پارٹی کی لاک ڈاؤ ن میں نرمی کی مخالفت سمجھ سے بالاتر ہے۔

اجمل بلوچ  کا کہنا ہے کہ  برائے مہربانی سیاست کرنے کا بہت وقت پڑا ہے تاجر سخت پریشان ہے ان پر سیاست نہ کی جائے۔ وزیراعظم اگر لاک ڈاؤن میں نرمی کے حق میں ہیں تو اپوزیشن کی مخالفت کا کوئی جواز نہیں بنتا۔