عالمی مالیاتی ادارہ(آئی ایم ایف )پاکستان کو 6 ارب ڈالر کی تیسری قسط میں 50 کروڑ ڈالر دے گا۔

تفصیلات کے مطابق  آئی ایم ایف اور پاکستان میں توسیعی فنڈ کی  تیسری قسط پر معاملات طے پا گئے ہیں۔

آئی ایم ایف  کی جانب سے جاری کردہ اعلامیے میں کہا گیا ہے کہ  آئی ایم ایف پاکستان کو 6 ارب ڈالر کی تیسری قسط میں  50 کروڑ ڈالر دے گا۔

اعلامیے میں کہا گیا ہے کہ 50 کروڑ ڈالر آئی ایم ایف ایگزیکٹیو بورڈ کی منظوری کے بعد جاری  کیے جائیں گے۔

آئی ایم ایف اعلامیے میں کہا گیا کہ پاکستان نے پالیسی کی بہتری اور ڈھانچہ جاتی اصلاحات میں پیش رفت دکھائی ہے۔کورونا وباء  کی مشکل صورتحال کے بعد معیشت بہتری کی جانب گامزن ہے۔

اعلامیے میں کہا گیا کہ آئی ایم ایف پروگرام کے تحت دیے جانے والے کئی اہداف حاصل کیے گئے ہیں۔2021  میں پاکستان کی شرح نمو 1.5 فیصد رہنے کا امکان ہے جو 2020 میں منفی 0.4 تھی۔

آئی ایم ایف اعلامیے میں بتایا گیا کہ   پاکستان کے کرنٹ اکاؤنٹ میں بہتری اور ترسیلات زر میں  بھی اضافہ ہوا ہے ۔ پاکستان ایف اے ٹی ایف کے ایکشن پلان پر عملدرآمد میں  بھی پیش رفت کررہا ہے۔

اعلامیے میں بتایا گیا کہ  بجلی کے شعبے میں لاگت میں کمی، ٹیرف ایڈجسٹمنٹ اور سبسڈیز کم کی گئی ہیں۔ اسٹیٹ بینک کو خودمختار کرنے اور نیپرا اور اوگرا میں اصلاحات کی جارہی ہیں۔حکومتی ملکیتی کمپنیز  کے نقصانات کو کم کرنے کے لیے اقدامات کیے جارہے ہیں۔