پاکستانی ڈرامہ و فلم انڈسٹری کی اداکارہ و سُپر ماڈل آمنہ الیاس نے ’گرل فرینڈز‘ کے موضوع پر بنائی دلچسپ ویڈیو سوشل میڈیا پر شیئر کی جو مداحوں کو خوب بھا گئی۔

آمنہ الیاس کی جانب سے ایک نئی مزاحیہ ویڈیو شیئر کی گئی ہے جس میں اُنہوں نے ایک ناراض گرل فرینڈ کا کردار ادا کیا ہے۔

اداکارہ ویڈیو میں ایک ایسی گرل فرینڈ کا کردار ادا کر رہی ہیں جو ناراض ہے اور چاہتی ہے کہ اُس کے نخرے اٹھائے جائیں اور منایا بھی جائے۔

آمنہ الیاس کی اس ویڈیو پر جہاں اُن کے لاکھوں مداح اُن کی حسِ مزاح اور اداکاری کی تعریف کر رہے ہیں، وہیں شوبز انڈسٹری کی معروف اداکارائیں بھی خوب قہقہے لگا رہی ہیں اور ویڈیو کی تعریفیں کر رہی ہیں۔

واضح رہے کہ اداکارہ آمنہ الیاس سوشل میڈیا پر کافی متحرک نظر آتی ہیں اور آئے دن سنجیدہ، معاشرتی اور سماجی موضوعات سمیت مزاحیہ اور دلچسپ ویڈویوز بنا کر اپنے مداحوں کے ساتھ شیئر کرتی رہتی ہیں جنہیں انٹرنیٹ صارفین سمیت اُن کے دوستوں کی جانب سے خوب پسند کیا جاتا ہے۔