معروف اداکارہ صدف کنول نے یہ انکشاف کیا ہے کہ انہوں نے اپنے ایک بیان پر اداکارہ و گلوکارہ علیزے شاہ سے معافی مانگی تھی۔

صدف کنول نے حال ہی میں اپنے شوہر اداکار شہروز سبزواری کے ساتھ ایک شو میں شرکت کی۔

اس دوران صدف کنول نے میزبان کے ایک سوال کے جواب میں بتایا کہ انہوں نے علیزے شاہ سے اپنے ایک بیان پر باقاعدہ معافی مانگی تھی۔

اداکارہ صدف کنول نے تفصیل بتاتے ہوئے کہا کہ وہ ایک شو میں بطور مہمان شریک تھیں اور اُن سے ایک ایسا سوال کیا گیا تھا کہ وہ کون سی اداکارہ ہیں جنہیں وہ اپنے شوہر کے ساتھ اداکاری کرتے نہیں دیکھ سکتیں۔

 انہوں نے کہا کہ اُنہیں مجبوراً کسی ایک اداکارہ کا نام لینا پڑا اور انہوں نے کہہ دیا کہ وہ اپنے شوہر شہروز سبزواری کو کبھی علیزے شاہ کے ساتھ کام کرنے کی اجازت نہیں دیں گی۔

اداکارہ نے کہا کہ اُن کا کسی کو تکلیف پہنچانے یا دل توڑنے کا ارادہ نہیں تھا، اُنہیں مجبوراً ایسا کرنا پڑا تھا جس کے لئے انہوں نے بعد میں علیزے شاہ کو باقاعدہ فون کال کر کے معافی بھی مانگی تھی۔

صدف کنول نے بتایا کہ اب اُن کے اور علیزے شاہ کے درمیان تعلقات بہتر ہیں، اُن کے اور علیزے شاہ میں اب کوئی ناراضی نہیں ہے۔