کورونا وائرس سےبچاو اور وباسے نمٹنے کیلئے چین سے خریدے گئے 7 ارب 90 کروڑ مالیت کے میڈیکل سامان کی دوسری کھیپ پاکستان پہنچ گئی۔

تفصیلات کے مطابق این ڈی ایم اے کی جانب سے خریدے گئے سامان کی دوسری کھیپ اسلام آباد پہنچی ہےجوکہ نیشنل ڈیزاسٹر رسک مینجمنٹ فنڈ اور ایشین ڈویلپمنٹ بینک کی جانب سے فراہم کردہ 7 ارب 90 کروڑکی امدادی رقوم سے خریدا گیا۔

پی آئی اے کی خصوصی پرواز کے ذریعے چین سے خریدے گئے 52 ٹن سامان کو اسلام آباد پہنچایا گیاہے جس میں 2000 ٹیسٹنگ کٹس، 50موبائل ایکسرے مشین،ایک لاکھ این 95 ماسکس، 5 لاکھ میڈیکل ماسکس، 10ہزار سرجیکل گاؤن شامل ہیں۔ جبکہ دیگر سامان میں اسکریننگ کٹس، آئی سی یو وینٹیلیٹرز بھی شامل ہیں۔ جس کو پی آئی اے کی خصوصی پرواز کےذریعے چین سے پاکستان لایا جائے گا۔

ترجمان این ڈی ایم اے کے مطابق محکمے کی جانب سے دیگر سامان کی خریداری بھی کی جاچکی ہے۔