صوبائی وزیرفیاض الحسن چوہان کا کہنا ہے کہ ن لیگ نے پاکستان کی ہستی بستی معیشت کوگرہن زدہ کر دیا۔

تفصیلات کے مطابق پنجاب کے وزیر اطلاعات فیاض الحسن چوہان نے اپنے ایک بیان میں کہا کہ اپوزیشن بالخصوص ن لیگ کا بجٹ پر واویلا سمجھ سے بالاتر  ہے، لیگی قائدین کو اپنے ادوار کے بجٹ میں لگائے گئے ٹیکسوں پر بھی نظر ڈالنی چاہئے۔

فیاض الحسن چوہان کا کہنا ہے کہ  2015 اور 2016 میں لیگی حکومت نے دو درجن سے زائد سروسز پر ٹیکس لگائے،2017 اور 2018  میں ن لیگ نے سروسز پر سیلز ٹیکس کی شرح میں 84 فیصد اضافہ کیا۔

انہوں نے کہا کہ ن لیگ نے اپنے ادوار میں کم آمدن والے طبقے پر زیادہ ٹیکس لگایا جبکہ بزدار حکومت نے 20  سے زیادہ سروسز پر ٹیکس میں چھوٹ دی ہے۔

پنجاب کے وزیر اطلاعات نے کہا کہ موجودہ بجٹ میں کسی قسم کا نیا ٹیکس عائد نہیں کیا گیا۔