مسلم لیگ ن کے رہنما خواجہ آصف نے کہا ہے کہ حکومت کو اپنی صفوں میں موجود لوگوں کی کرپشن نظر نہیں آتی، حکومت کی نا اہلی اور کرپشن کو بے نقاب کرتے رہیں گے۔

اسلام آباد میں میڈیا سے گفتگو کرتے ہوئے خواجہ آصف نے کہا کہ تحریک انصاف کے شروع کیے گئے منصوبے آج مقبرے بنے ہوئے ہیں،پاکستان کی سترسالہ تاریخ میں بجلی کے اتنے منصوبے نہیں لگے جتنے ہمارے دور میں لگے جب کہ تحریک انصاف کے شروع کیے گئے منصوبے آج مقبرے بنے ہوئے ہیں۔

خواجہ آصف کا کہنا تھا کہ پنجاب میں آٹا اور چینی منہگے داموں مل رہی ہے، بجلی ہماری ضرورت سے وافر مقدار میں موجود ہے مگر بجلی کی قلت معیشت کے برے حالات میں اور اضافہ کررہی ہے،حکومت کی سرپرستی میں مافیاز پل رہے ہیں۔

اس سے قبل احسن اقبال نے کہا تھا کہ سی پیک کا پہلا مرحلہ انفرااسٹرکچر کا منصوبہ تھا، وزیر اعظم مسلم لیگ ن کے منصوبوں کا فیتہ کاٹ رہے ہیں۔