کراچی میں بارش کے دوران آسمانی بجلی گرنے،کرنٹ لگنے اور مختلف حادثات میں  7  افراد جاں بحق ہوگئے ۔

 تفصیلات کے مطابق ملیر میمن گوٹھ میں آسمانی بجلی گرنے سے 2 افراد شاہ نواز اور سلطان ملاح جاں بحق ہوگئے۔ ڈاکس تھانے کی حدود مچھر کالونی الفلاح چوک کے قریب کرنٹ لگنے سے 20 سالہ سیف اللہ ولد جاوید جاں بحق ہوگیا۔

 بلدیہ 9نمبرسیکٹر 12/E گھر میں کام کے دوران کرنٹ لگنے سے 42سا لہ شیراز ولد خو اجہ محمد جاں بحق ہوگیا۔

نیو کراچی تھانے کی حدود بسم اللہ ‎ہوٹل یوسی14 سیکٹر الیون ای نارتھ کراچی نالہ اسٹاپ کے قریب بارش کے پانی میں ڈوب کر3 افراد جاں بحق ہوگئے۔

پولیس کے مطابق 22سالہ عدنان شاہ ولد عنایت شاہ،35 سالہ ناصر حسین شاہ ولد عنایت شاہ اور 18سالہ بلال شاہ ولد ناصر حسین شاہ اپنا پنکچر کا ٹھیہ بچاتے ہوئے نالے میں بہہ گئے۔

 اورنگی ٹاؤن سیکٹر ساڑھے گیارہ میں2 افراد موٹر سائیکل سمیت نالے میں گر گئے۔

لیاقت آباد تین ہٹی لیاری ندی میں 17 سالہ علی رضا ڈوب گیا، علاقہ مکینوں کے مطابق چند بچے فٹبال کھیل رہے تھے،فٹبال پانی میں چلی گئی، جسے نکالتے ہوئے علی رضا پانی کے تیز بہاو میں بہہ گیا،تمام ریسکیو اداروں سے رابطہ کیاگیا لیکن ایک گھنٹہ گزر جانے کے باوجود کوئی نہیں آیا۔