وزیراعظم عمران خان کی جانب سے وفاقی کابینہ کا اجلاس کل طلب کرلیا گیا۔

تفصیلات کے مطابق وزیراعظم عمران خان کی زیر صدارت اجلاس میں ملکی سیاسی، معاشی و سلامتی کی صورتحال اور کراچی میں حالیہ  بارش سے ہونے والے نقصان کا جائزہ لیا جائے گا۔

ذرائع کےمطابق وفاقی کابینہ اجلاس کا 14 نکاتی ایجنڈا بھی جاری کردیا گیا ہے جس میں اسلام آباد، لاہور، کراچی، پشاور، ملتان میں بلند عمارتوں کی تعمیر پر بات ہوگی، جبکہ ملک کے بڑے ایئرپورٹس کو آؤٹ سورس کرنے کے وقت کا تعین کیا جائے گا۔

اجلاس میں  پاکستان پیٹرولیم بورڈ کے انتخاب کیلئے ڈائریکٹرز کی نامزدگیوں کی منظوری دی جائے گی اس کے علاوہ نیبپرا کی سالانہ رپورٹ 2018 ء اور 2019ء کابینہ میں پیش کی جائے گی۔

اجلاس کے ایجنڈا میں وفاقی حکومت کی منظوری کے بغیر سرکاری تقرریوں پر کابینہ میں رپورٹ پیش ہوگی، جج بینکنگ کورٹ 3 کراچی محمد سعد قریشی کی ڈیپوٹیشن مدت بڑھانےکی منظوری دی جائے گی۔

کابینہ کمیٹی نجکاری کے 21 اگست کے فیصلوں کی توثیق کی جائے گی، کابینہ کمیٹی صنعتی اصلاحات کے 27 جولائی، 13 اگست کے فیصلوں کی توثیق ہوگی

اجلاس کے ایجنڈا کے مطابق وفاقی کابینہ اقتصادی رابطہ کمیٹی کے 21 اگست کے فیصلوں کی توثیق کرے گی۔