سعودی عرب کی جانب سے ناروے کے لیے آمال یحیی المعلمی کو سفیر مقرر کیا ہے۔  سعودی عرب کی تاریخ میں دوسری خاتون کو سفیر کے منصب پر فائز کیا گیا ہے۔

خادم حرمین شریفین شاہ سلمان بن عبدالعزیز نے ولی عہد شہزادہ محمد بن سلمان کی موجودگی میں نئی سفیر سے حلف لیا ہے۔

سعودی خبررساں ادارے کے مطابق آمال یحیی المعلمی متعدد سرکاری عہدوں پر فائز رہ چکی ہیں- گزشتہ برس انہوں نے سعودی انسانی حقوق کے ادارے میں عالمی تعاون اور تنظیموں کے ڈائریکٹر جنرل کے عہدے پر خدمات سرانجام دیں۔ اس سے قبل وہ کئی تعلیمی اور پیشہ ورانہ اداروں میں خدمات انجام دے چکی ہیں۔
آمال المعلمی اقوام متحدہ  میں سعودی سفیر عبداللہ یحیی المعلمی کی بہن اور معروف سعودی ادیب اور مملکت میں امن عامہ کے معاون ڈائریکٹر یحیی المعلمی کی بیٹی ہیں۔
المعلمی نے امریکہ کی ڈینور یونیورسٹی سے عوامی رابطہ اور ابلاغ میں اعلی ڈگری حاصل کی۔ انہوں نے امیرہ نورہ یونیورسٹی سے انگلش لٹریچر میں بی اے آنرز کیا  جبکہ برطانیہ کی آکسفورڈ یونیورسٹی کے ماتحت اسلامک سٹڈیز سینٹر سے فیلو شپ کیا۔