قومی کرکٹ ٹیم کے سابق کپتان وسیم اکرم نے کہا ہے کہ ڈین جونز ایک ایسے عظیم انسان تھے جو ’اسٹیڈنگ اوویشن‘ کے مستحق تھے۔

تفصیلات کے مطابق سابق کرکٹر وکمنٹیٹر ڈین جونز کی آخری رسومات کی ادائیگی کے بعد وسیم اکرم نے ان کیلئے خصوصی پیغام جاری کرتے ہوئے کہا کہ ڈین جونز ایک ایسے عظیم انسان تھے جو ’اسٹینڈنگ اوویشن‘ کے مستحق تھے یعنی لوگ کھڑے ہوکر ان کا استقبال کریں۔ ’ڈین جونز ہم یہاں آپ کیلئے ہمیشہ کھڑے ہیں۔‘

وسیم اکرم کی اہلیہ شنیرا نے بھی ڈین جونز کیلئے خصوصی پیغام جاری کرتے ہوئے کہا کہ ڈین جونز آپ کی خدمات کیلئے ہم آپ کو سلام پیش کرتے ہیں، آپ نے نہ صرف آسٹریلیا کیلئے فخریہ خدمات سرانجام دیں بلکہ آپ نے پاکستان میں انٹرنیشل کرکٹ کی بحالی کیلئے بھی بہت مدد کی، ہم تہہ دل سے آپ کے شکر گزار ہیں اور ہمیں بہت یاد آئیں گے۔

یاد رہے کہ گزشتہ ہفتے ڈین جونز ہارٹ اٹیک کے سبب ممبئی میں انتقال کر گئے تھے، ان کی عمر 59 سال تھی جبکہ گزشتہ روز وکٹوریہ میں ہونے والی ایک نجی تقریب میں ڈین جونز کو سپرد خاک کیا گیا۔

 ڈین جونز کی آخری رسومات میں اہل خانہ اور صرف قریبی دوست مدعو تھے، میمیوریل سروس میں صرف 10 لوگوں نے ہی شرکت کی۔