وفاقی وزیرسائنس و ٹیکنالوجی فواد چوہدری کا کہنا ہے کہ میں نواز شریف کے باہر جانے کے خلاف تھاکیونکہ جب ایسے لوگ باہر جاتے ہیں تووہ انٹرنیشنل ایجنڈے کا حصہ بن جاتے ہیں، نواز شریف خطرناک بیانیے پر کام کر رہے ہیں۔

میڈیا سے گفتگو کرتے ہوئے فواد چوہدری نے کہا ہے کہ 2011 میں عمران خان نے تو کہا تھا کہ احتساب کا عمل شروع ہو گا اور یہ اکھٹے ہو جائیں گے، 11 پارٹیاں 15 سے 18 ہزار لوگ بھی اکٹھے نہیں کر پائیں۔

انہوں نے کہا کہ گزشتہ روز کے جلسے میں کشمیر اور کلبھوشن پر کوئی بات نہیں کی گئی، ن لیگ کے کارکن قیادت کے بیانیے سے مطمئن نہیں ہیں۔

فواد چوہدری نے کہا کہ سابق وزیر اعظم نواز شریف کا عمل ایسا ہے جیسے ناراض محبوبہ کا ہوتا ہے۔ ن لیگ سے کہتا ہوں خطرناک کھیل نہ کھیلے لیکن نواز شریف کو سمجھ نہیں آرہی کہ کیسے بدلہ لیں۔ امید ہے آپ باقی جلسے مؤخر کر دیں گے۔