معاون خصوصی ڈاکٹر فردوس عاشق اعوان کا کہناہے کہ اپوزیشن ملکی ترقی اور عوام کی خوشحالی کیخلاف سازشوں میں مصروف ہے۔

تفصیلات کے مطابق ڈاکٹر فردوس عاشق اعوان نے اپنے ایک بیان میں کہا ہے کہ اپوزیشن ملکی ترقی اور عوام کی خوشحالی کے خلاف سازشوں میں مصروف ہے۔ جلسوں سے حکومت نہیں جائے گی لیکن کورونا ضرور گھر آئے گا۔

انہوں نے کہا کہ ملتان میں ایک بار پھر تماشہ لگایا جا رہا ہے لیکن عوام کے جان و مال کا تحفظ بزدار حکومت کی اولین ذمہ داری ہے اور وزیراعلیٰ پنجاب عوام کی زندگیوں کے تحفظ کے لیے ضروری اقدامات اٹھا رہے ہیں۔

معاون خصوصی نے کہا کہ جاتی امرا کی مہارانی کو عوام سے نہیں اقتدار سے غرض ہے، پشاور جلسے کے بعد کورونا کیس بڑھ گئے لیکن انہیں احساس ہی نہیں۔

انہوں نے کہا کہ عقل سے ناپید اپوزیشن کے جعلی لیڈروں کو صورتحال کا ادراک نہیں،ایک شہزادہ کورونا کا شکار ہو کر اپنے محل میں بیٹھا ہے لیکن پھر بھی جلسوں پر بضد ہے۔

فردوس عاشق اعوان نے کہا کہ ریاست کی رٹ چیلنج کرنے والوں سے آہنی ہاتھوں نمٹیں گے اور کورونا وبا کے دوران عوام کی زندگی خطرے میں نہیں ڈال سکتے۔