کورونا وائرس کے خطرناک حد تک پھیلاؤ کو روکنے کیلئے اٹلی نے سال نو اور کرسمس کے موقع پر ملک بھر میں سخت ترین لاک ڈاؤن لگانے کا اعلان کردیا ہے۔

غیر ملکی خبر رساں ادارے کے مطابق اٹلی میں کرسمس اور سال نو کی تعطیلات کے دوران ملک بھر میں سخت لاک ڈاؤن کا اعلان کیا گیا ہے۔

تفصیلات کے مطابق لاک ڈاؤن کا فیصلہ کرسمس میں ہونے والے اجتماعات کے باعث کورونا کے ممکنہ پھیلاؤ کو روکنے کیلئے کیا گیا ہے۔

لاک ڈاؤن کے دوران ملک کو ریڈ زون قرار دیتے ہوئے اسی مناسبت سے پابندیاں عائد کی گئی ہیں جبکہ تمام شاپنگ مال، غیر ضروری دکانیں اور اجتماعات پر مکمل پابندی ہوں گی۔

اٹلی کے وزیراعظم جوزپے کونٹے نے کرسمس پر لاک ڈاؤن کے اقدام کو مشکل ترین فیصلہ قرار دیتے ہوئے کہا ہے کہ طبی ماہرین نے کرسمس اجتماعات سے کورونا کے پھیلاؤ میں بے پناہ اضافے کا خدشہ ظاہر کیا تھا، جس کی وجہ سے ہم نے لاک ڈاؤن کا فیصلہ کیا ہے۔

انہوں نے مزید کہا کہ اس ماہ کے اخر تک ملک بھر کورونا ویکسین کا آغاز ہوجائے گا۔