امیر جماعت اسلامی سراج الحق نے کہا ہے کہ موجودہ حکومت نے سب سے بڑا یوٹرن کشمیر پالیسی پر لیا۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا ہے کہ براڈ شیٹ سکینڈل میں سب ایکسپوز ہو گئے ،پی ٹی آئی اور پی ڈی ایم میں صرف اقتدار کے گھوڑے پر بیٹھنے پر اختلاف ہے۔

امیر جماعت اسلامی نے کہا کہ کراچی کے لیے گیارہ سو ارب روپے کا اعلان کیا گیا جو کاغذوں تک محدود رہا، قائد اعظم ایک وکیل تھے انہوں نے عظیم جدوجہد سے مسلمانوں کو مملکت خدا داد پاکستان کا تحفہ دیا۔

سراج الحق نے یہ بھی کہا کہ حقیقی تبدیلی آئین و قانون کی بالا دستی ، عدل و انصاف کے قیام کے لیے و کلا جماعت اسلامی کا ساتھ دیں جبکہ سول اور فوجی آمریت کے دور میں بھی بار نے حق اور سچ کا ساتھ دیا ہے۔

امیر جماعت اسلامی سراج الحق نے مزید کہا کہ وفاقی و صوبائی حکومتیں اور حکمران پارٹیاں مسلسل کراچی کے عوام کو سبز باغ دکھا رہی ہے جبکہ بدقسمتی سے ملک کے اندر چھوٹے اور بڑے کے لیے الگ الگ قانون ہے۔