وفاقی ملازمین کی تنخواہوں میں اضافہ کا معاملہ، قومی خزانے پر کتنا بوجھ پڑے گا؟

وزارت خزانہ کا اس سلسلے میں کہنا ہے کہ وفاقی ملازمین کی تنخواہوں میں 25 فیصداضافہ سے سالانہ 30 ارب روپے کا مالی اثر پڑے گا، تنخواہوں میں اضافہ کا مارچ سے جون 2021 تک 10 ارب روپے کا مالی اثر پڑے گا۔

  وزارت خزانہ کے مطابق آئی ایم ایف نے ملازمین کی تنخواہوں میں اضافے پر اعتراض نہیں کیا، آئی ایم ایف کے ساتھ 6 ارب ڈالر کی تیسری قسط کیلئے مذاکرات کا آغاز جلد ہوگا۔

ذرائع وزارت خزانہ نے بتا یا کہ آئی ایم ایف کی جانب سے مالی استحکام کی ہدایت سامنے آئی ہے، آئی ایم ایف نے قرضوں میں کمی کا مطالبہ کیا ہے،حکومت نے مالی استحکام اور قرضوں میں کمی کیلئے اقدامات کئے ہیں۔

واضح رہےکہ وزیراعظم عمران خان نے سرکاری ملازمین کی تنخواہوں میں اضافے کی منظوری دے دی۔

ذرائع کا کہنا ہے کہ وزیراعظم نے وزارت خزانہ کے حکام اور مذاکراتی کمیٹی کی بریفنگ کے بعد سرکاری ملازمین کی تنخواہوں میں اضافے کی منظوری دی تاہم یہ منظوری کابینہ سے بھی لی جائے گی۔