ممتازحریت رہنماء یاسین ملک کی اہلیہ مشعال حسین ملک کا کہناہے کہ 27 فروری کو پاک فضائیہ نے بھارتی خواب چکناچور کردیا ، بھارت خطے میں حالات خراب کرنا چاہتا تھا۔

مشعال حسین ملک نے اسلام آباد میں تقریب سے خطاب کرتے ہوئے کہا کہ پاکستانی آرمڈ فورسز نے ایک بار پھر ثابت کیا کہ وہ پروفیشنل فورس ہیں۔

انہوں نے بھارت کے کشمیریوں پر مظالم پر روشنی ڈالتے ہوئے کہا کہ مقبوضہ کشمیر میں بھارتی فوج کشمیریوں کی نسل کشی کر رہی ہے، بھارتی فوج چادر اور چار دیواری کا تقدس پامال کرتی ہے، بھارتی فوج نہتے نوجوانوں کو شہید کرتی ہے۔

مشعال ملک نے کہا کہ کشمیریوں کے حقوق میں آواز بلند کرنے کی ضرورت ہے، نوجوان بھارتی مظالم پر اقوام متحدہ کو خط لکھیں، ۔

انہوں نے کہا کہ نہتے کشمیری نو لاکھ بھارتی فوج کا مقابلہ کر رہے ہیں جبکہ بھارت نے تمام حریت قائدین کو قید کر رکھا ہے۔

انہوں نے اقوام متحدہ سے مطالبہ کرتے ہوئے کہا کہ اقوام متحدہ سیاسی قائدین کے رہائی کے لیے اقدامات اٹھائے، اقوام متحدہ کشمیریوں کو حق خودارادیت دلانے میں کردار ادا کرے۔

مشعال ملک کا کہناتھا کہ کشمیر میں لوگوں کو رنگ نسل، ذات دیکھے بغیر تشدد کا نشانہ بنایا جا رہا ہے، جنت نظیر وادی میں 2 سال سے کرفیو نافذ ہے اور کشمیریوں کے حقوق کی مسلسل خلاف ورزی جاری ہے۔

انہوں نے کہا کہ کشمیر میں جاری مظالم کا نشانہ پوری دنیا بھی بن سکتی ہے، کشمیر میں آرٹیکل 370 کا نفاذ غلط ہے، کشمیریوں کو حق خودارادیت نہیں دیا جا رہا۔

انہوں نے کہا کہ کشمیر میں حالات خراب ہوتے جا رہے ہیں،مودی سے کچھ بھی توقع رکھی جا سکتی ہے۔

اس موقع پر انہوں نے امریکن انٹر فیتھ ہارمونی کے اسپیشل ڈلیگیشن کی آمد پر ان کا شکریہ ادا کیا۔