دنیا میں سب سے زیادہ بزنس کرنے والی فلم “ایوینجرز اینڈ گیم”کی آمدنی کا ایک بڑا ریکارڈ چین میں ٹوٹ گیا ہے۔

تفصیلات کے مطابق چین میں نئے قمری سال کے موقع پر ریلیز ہونے والی فلم ‘ڈیٹیکٹو چائنا ٹاؤن 3’ نے ریلیز کے پہلے ہفتے ہی دھوم مچا دی۔

چینی فلم  ‘ڈیٹیکٹو چائنا ٹاؤن 3’ نے کسی ایک ملک میں سب سے زیادہ آمدنی کا ریکارڈ ایوینجرز اینڈگیم سے چھین لیا۔

اس نئی فلم نے جمعے سے اتوار کے دوران چین میں 39 کروڑ 85 لاکھ ڈالر سمیٹے جبکہ ایوینجرز اینڈ گیم نے امریکا  میں پہلے ہفتے میں 35 کروڑ 70 لاکھ ڈالر کمائے تھے۔

چینی فلم نے ڈیٹیکٹیو چائنا ٹاؤن 2 کے مقابلے میں ڈھائی گنا زیادہ بزنس کیا ہے جس نے 2018 کے نئے قمری سال کے موقع پر 15 کروڑ 60 لاکھ ڈالرز بٹورے تھے۔

اس نئی فلم نے کسی ایک ملک میں ایک دن میں سب سے زیادہ بزنس کا ریکارڈ بھی اپنے نام کیا جو 16 کروڑ 20 لاکھ ڈالرز تھا۔

فلم کی کہانی ایک نوجوان معمے حل کرنے والے (لیو ہاؤرن) اور اس کے انکل (وانگ باؤ چیانگ) کے گرد گھومتی ہے جو جرائم کو حل کرتے ہیں۔

اس کا پہلا حصہ 2015 کو کرسمس کے موقع پر ریلیز ہوا تھا اور اس نے چین میں ساڑھے 12 کروڑ ڈالرز کا بزنس کیا تھا۔

تیسرا حصہ 2020 میں نئے قمری سال کے موقع پر ریلیز ہونا تھا مگر کورونا وائرس کی وباء کے باعث ایسا نہیں ہوسکا اور یہ ایک سال تاخیر سے ریلیز کیا گیا۔

فلمی پنڈتوں کا کہناہے اگر یہ فلم کسی طرح 93 کروڑ 70 لاکھ ڈالرز سے زیادہ کمالیتی ہے تو اسٹار وارز دی فورس اویکن کا ریکارڈ بھی توڑ دے گی۔

خیال رہے کہ اسٹار وارز سیریز کی اس فلم نے امریکا میں 93 کروڑ ڈالرز سے زیادہ کا بزنس کیا تھا۔