امیر جماعت اسلامی سراج الحق نے کہا ہے کہ حکومت نام کی چیز صرف ٹی وی سکرین پر موجود ہے اب تک اس حکومت میں دو سو چھبیس اجلاس ہوچکے ہیں پر نتیجہ کچھ نہ نکلا۔

تفصیلات کے مطابق امیر جماعت اسلامی سراج الحق نے منصورہ میں میڈیا سے گفتگو کرتے ہوئے کہا کہ ملک میں اس وقت کرپشن جاری ہے ہر پارٹی کے اپنے اپنے لوگ ہیں۔

سراج الحق نے کہا کہ مافیاز کی سیاست ہےانھوں نے پورا نظام یرغمال بنایا ہوا ہے۔

انہوں نے یہ بھی کہا کہ کرپشن کی وجہ سے کھیلوں کی دنیا برباد ہوگئی ہے اور کھیلوں کی دنیا متاثر ہوئی تو اسپتال آباد ہو گئے۔

امیر جماعت اسلامی کا کہنا تھا کہ اسپتالوں میں چارپائی نہیں ہے ایک ایک بیڈ پر تین تین لوگ علاج کروا رہے ہیں۔

سراج الحق نے کہا کہ کھیلوں کی وجہ سے دنیا ایک دوسرے کے قریب آجاتی ہے پر اس حکومت کے آنے کے بعد کھیلوں کی دنیا برباد ہو گئی ہے۔

انہوں نے یہ بھی کہا کہ فیفا نے ہماری فٹبال ٹیم پر پابندی لگا دی ہے جبکہ تحریک انصاف نے کھیلوں کے لئے سب سے کم بجٹ رکھا ہے۔

امیر جماعت اسلامی نے کہا کہ وزیر اعظم نے کہا تھا کرکٹ کو آسٹریلیا کی طرز پر چلاؤں گا۔

سراج الحق نے کہا کہ ہماری کوشش ہو گی ہر ضلعے میں گراؤنڈ بنایا جائے۔

انہوں نے یہ بھی کہا کہ بڑے بڑے گراؤنڈ پر لوگوں نے ناجائز قبضے کر لیے ہیں۔

امیر جماعت اسلامی کا کہنا تھا کہ ہمارے ملک میں بے انتہا باصلاحیت کھلاڑی موجود ہیں لیکن نوجوانوں میں مایوسی کی وجہ سے نشہ عام ہو گیا ہے۔

سراج الحق نے کہا کہ جے آئی یوتھ کرکٹ بورڈ قائم کرنے جا رہے ہیں۔

انہوں نے یہ بھی کہا کہ لڑکوں کے ساتھ ساتھ لڑکیوں کو بھی پردے کے ساتھ کھیلوں کے مواقع فراہم کرنا ضروری ہیں۔

امیر جماعت اسلامی کا کہنا تھا کہ تیس تاریخ کو پشاور میں فلسطین مارچ کرنے جا رہے ہیں یہ کے پی کا سب سے بڑا اور عظیم مارچ ہو گا۔

سراج الحق نے کہا کہ ڈی جی خان میں جس طرح ظلم کر کے نوجوان کو قتل کیا گیا یہ ظلم ہے ،ہمارا نظام کھوکھلا ہوچکا ہے۔

امیر جماعت اسلامی کا کہنا تھا کہ قومی اسمبلی میں بیھٹے لوگ ایک ہی طرف کے لوگ ہیں ،ہم اس کھیل کا حصہ نہیں ہیں۔

سراج الحق نے کہا کہ پی ٹی آئی، ن لیگ اور پی پی پی سب ایک جیسے ہیں جبکہ ہم مسلسل احتجاج اور ملین مارچ پر ہیں۔

انہوں نے یہ بھی کہا کہ پی ڈی ایم کا کوئی مستقبل نہیں ہے ،پی ٹی آئی نے پی ڈی ایم کی پالیسیوں کو تسلسل دیا ہے۔

امیر جماعت اسلامی سراج الحق نے مزید کہا کہ آج تمام سیاسی جماعتیں دھاندلی کا شور مچاتی ہیں پر حکومت چاہتی ہے کہ کوئی ایسا واقعہ ہو جائے جس سے ان کو شہادت مل جائے۔