صدر پاکستان ڈاکٹرعارف علوی کا کہنا ہےکہ کشمیرپریمیئرلیگ کے انعقاد سے پوری دنیا میں کشمیر کاز اجاگر ہو گا۔

تفصیلات کے مطابق صدر پاکستان ڈاکٹر عارف علوی نے کہاکہ مظفرآباد میں کے پی ایل (کشمیرپریمیئرلیگ) کا انعقاد نا صرف ایک بڑی کامیابی ہوگی بلکہ یہ ایک کامیاب ترین لیگ بھی ہو گی۔

انہوں نے کہاکہ کے پی ایل کا انعقاد شاندار انداز میں ہو گا، بارڈر کے دونوں طرف لوگ اس لیگ میں دلچسپی لینگے، کشمیر پریمیئر لیگ کے ذریعے کشمیر کو عالمی کھیلوں میں متعارف کرانے میں بھی مدد ملے گی۔

صدر پاکستان نے کہاکہ نوجوان ٹیلنٹ کو راغب کرنے اور مثبت ملکی تاثر اجاگرکرنے کیلئے ملک میں میگا اسپورٹس ایونٹس کی ضرورت ہے۔

لیگ سے عالمی سطح پر کشمیر کے خوبصورت مناظر اور ثقافت کے فروغ کیلئے معیاری پلیٹ فارم ملے گا۔

ڈاکٹر عارف علوی نے کہاکہ کے پی ایل کے صدر عارف ملک اور سی ای او چوہدری شہزاد کی کاوشیں قابل ستائش ہیں۔

صدر پاکستان ڈاکٹرعارف علوی نے کہاکہ کے پی ایل کو قومی اور بین الاقوامی سطح پر اجاگر کرنے کے لئے ہر ممکن تعاون کریں گے۔