مسلم لیگ (ن) کی ترجمان مریم اورنگزیب نے کہا ہے کہ عمران خان کا وژن آٹا، بجلی، گیس، چینی کی چوری اور 50 لاکھ لوگوں کو بیروزگار کرنے کا ہے۔

تفصیلات کے مطابق مسلم لیگ (ن) کی ترجمان مریم اورنگزیب نے اسلام آباد میں پریس کانفرنس کرتے ہوئے کہا کہ عمران خان اور ملک پر مسلط ٹولے کو شرم آنی چاہیے، اس حکومت نے 14 ہزار ارب روپے کا قرض لے لیا ہے۔

مسلم لیگ (ن) کی ترجمان نے کہا کہ عمران خان کا وژن آٹا، بجلی، گیس، چینی کی چوری اور 50 لاکھ لوگوں کو بیروزگار کرنے کا ہے۔پنجاب میں کرپشن کا بازار گرم ہے، اربوں روپے کی چوری جاری ہے، یہ چور ، ڈکیت صرف دیہاڑیاں لگا رہے ہیں۔

 مریم اورنگزیب نے یہ بھی کہا کہ موجودہ دور حکومت میں شہباز شریف کے منصوبوں کو بند کیا گیا ہے۔ شہباز شریف نے 2014ء میں الیکٹرانک لائبریری اور تمام اسکولوں میں انٹرنیٹ کی سہولیات فراہم کیں۔

مسلم لیگ (ن) کی ترجمان کا کہنا تھا کہ وزیراعظم عمران خان کوشرم آنی چاہیےکہ وہ نواز شریف اورشہباز شریف کے منصوبوں پر تختیاں لگارہے ہیں، یہ حکومت جھوٹ کے پلندوں پر اپنی تختیاں لگاتی ہے۔

مریم اورنگزیب کا  یہ بھی کہنا تھا کہ ن لیگ کے دور میں فور اور فائیو جی ٹیکنالوجی متعارف کروائی گئی، جس لیپ ٹاپ پر یہ تنقید کرتے تھے، وہ بھی ریکارڈ پر موجود ہے، یوتھ پروگرام نواز شریف کا تھا۔ آج کی تاریخ تک یہ اپنا کوئی پروگرام شروع نہیں کرسکے، اگر یہ نیا اشتہار چھاپتے ہیں تو انہیں کوئی معاف نہیں کرے گا۔

مسلم لیگ (ن) کی ترجمان مریم اورنگزیب کا مزید کہنا تھا کہ عمران خان کے لیے شہزاد اکبر نے چوری جاری رکھی ہوئی ہے، معاون خصوصی احتساب کو بہت جلد قانونی معاون کی ضرورت پڑے گی۔