وفاقی وزیر فواد چوہدری کا کہنا ہے کہ انتخابی اصلاحات پر تمام جماعتیں بیٹھیں اور متفقہ فیصلہ کریں۔

تفصیلات کے مطابق وفاقی وزیر اطلاعات فواد چوہدری نے پی ٹی آئی رہنما بابر اعوان کے ہمراہ میڈیا بریفنگ دیتے ہوئے کہاکہ پولنگ ہو جاتی ہے اور اگلے دن تک نتیجہ نہیں آتا، پولنگ کے بعد سب سےا ہم مسئلہ بروقت نتیجہ نہ آنا ہے۔

انہوں نے کہاکہ الیکٹرانک ووٹنگ مشینز سے الیکٹرانک ریکارڈ بھی ہو گا اور پیپر ریکارڈ بھی ، اپوزیشن کو دعوت دیتے ہیں کہ آئیں اور اس ماڈل کو دیکھیں ،یہ مشینیں استعمال کرنے میں آسان ہیں۔

فواد چوہدری نے کہاکہ الیکٹرانک ووٹنگ مشینیں انٹرنیٹ سے منسلک نہیں ہوں گی، ہر پولنگ اسٹیشن میں یہ مشینیں موجود ہوں گی، مشینوں کی تیاری کیلئے الیکشن کمیشن پر بجٹ کا اضافی بوجھ نہیں پڑے گا۔

اس موقع پر پی ٹی آئی رہنما با بر اعوان نے کہاکہ این اے249میں نتائج کو تسلیم نہیں کیا گیا،اپوزیشن کو دعوت دیتے ہیں کہ آئیں اور الیکشن اصلاحات کیلئے تعاون کریں۔

انہوں نے کہاکہ ملک کے انتخابی نظام کو کینسر لاحق ہے۔اپوزیشن کےپاس جو بھی سوالات ہیں، حکومت ان کے جواب دے گی۔